YOHANE 1 - Bibilia Kui Mdedie fo Kimochi

Idedo likahaluka mndu

¹ Ipfo mawokyonyi kuweipfo idedo; liweipfo nalyo Idedo liwei na Ruwa, nalyo liwei Ruwa.

² Lyo liwekeri na Ruwa ili mawokyonyi.

³ Shindo shose shiipfo nyi shiishitane na mweeke folyo. Nalyo kulawode liweipfo kuwechitano kindo ma kimu kya isho shii-shitanepfo.

⁴ Lyo liwerie moo, na moo fu fukawa sa ya wandu.

⁵ Na sa yo nyi iwaa ipfo meemenyi, na meema fu fulaiambye.

⁶ Kuwei-pfo mndu aledumo nyi Ruwa rina lyake nyi Yohane.

⁷ O alecha kyewika-ho wuṟingishi kundu nawikye sa yo kiṟingishyo wandu washike iidikia wose.

⁸ Chio awei sa iya amonyi-pfo kya indi alecha kundu nawe mṟingishi moṟingishya wandu sa yo.

⁹ Nyi yo Sa ya lohi yo yelimika orio mndu ose ai kunu wuyana.

¹⁰ Nyi idedo liwekeri kunu wuyana na wuyana wu wuwuumbe kui mweeke folyo na wuyana wu manya wulammanye.

¹¹ O nyi alecha na orukenyi loke amonyi na iwo wai wake ma walamwambye.

¹² Indi iwo walemwambya na imwidikia kawaenengya wulimbi wo itano wana wa Ruwa wose.

¹³ Nawo nyiwo walefeo nyi Ruwa chi kui wuidimi wo mndu o wandupfo ma kui pfinya tsa mbihu-pfo, ma kui idumbwo lya msoro mliwe pfo kya indi Ruwa amonyi nyio ndeawo.

¹⁴ Nalyo idedo likahaluka mndu arie nyama tsa wandu likakaa kodu. Natso lukawona wuitoṟi woke, nawo wuitoṟi wu wui wo Mana kimumu mfi aikaa na Wande aichuo wutonga pacha na wukilohi wose.

¹⁵ Yohane nyi aṟingishye kyake kechipoṟohora na ihamba, “Ichu nyio ulya njilehamba kyake, ke kwipfo aicha oo numa yako na nawenjisongoye nyi aweipfo, kipfa o awekukeṟye-ho, inyi njilamefeo.”

¹⁶ Na ili pfo koke nyi kidahyonyi lukawa welimyo kisumbo kikaweitumano nyi kisumbo.

¹⁷ Cha kipfa Ruwa naleende wuwawaso wulya kui Mose, indi wutonga na wukilohi, wo nyi wuleendo nyi Yesu Kristo.

¹⁸ Kuipfo mndu alemewona Ruwa ma indipfo. Ichu akeri Mana oke kimumu mfi ai cha Ruwa alunganyi na wande, nyio aleluongoya mbonyi tsa Ruwa.

Wuṟingishi wo Yohane Mpatisi

¹⁹ Na kiṟingishyo kilya kya Yohane kikeri kii-le lya mandi Wayuda walemdumya wandu wakohanyi na Walewi wawuka kulya Yerusalemu wahende imbesa wahambe, “A iyo nyi ukeri o wu?”

²⁰ Nao kakuhambya na pata ma alakane kakuhambya, “Inyi chi njii Kristo-pfo.”

²¹ Wakambesa, “A iyo nyiu? Ngesa nyi ukeri Elia?” Yohane kahamba, “O chi inyipfo.” A ngesa ukeri mwikimbi ulya? Nao kahaluo, “Oo.”

²² Nahong'u wakambia, “A nyi ukeri nyi wu? A nyi wuda ohamba kyapfo iyo kumonyi? Natso luwone kindo lochihenda iwia walya waludumye?”

²³ Nao kahamba, “Inyi njikeri mndu ulya mwikimbi Yesaya alehamba kyake, ‘Ru lya mndu moedya kundo kuwode olele kehamba, keachikyenyi njia ya Mndumii.’”

²⁴ Na wandu walya wai-wadume nyi Wafarisayo.

²⁵ Wakawesa Yohane “A nyi ki kyaduma kowa mopatisa wandu na iyo kulakeri Kristo ma Elia, ma mwikimbi ulya?”

²⁶ Yohane kahalwo kahamba, “Inyi njechekepatisa na mṟinga, indi kwipfo ahoṟoki kiidi kyanu nanyo mulamwichi.

²⁷ Nyio sa aicha numa yako, na inyi njimfoi ma ipfungwo ngowa tsa shadu shakepfo.”

²⁸ Kyasia-ng'u nakyo kundo kyewutikya kido nyi kulya Betanyia kulya molyola ya meda fo Yordanyi kundo Yohane echipatisya.

Kichondi kya Ruwa

²⁹ Na ili lya ngama Yohane kawona Yesu kyechimchea kahamba, “Aiki kichondi kya Ruwa kyechiwuta-ho wunyamaṟi wo wuyana.

³⁰ Nao nyio ichu njiweihamba kyake ke kwipfo msoṟo aicha numa yako, na nyi aweipfo kipfa o awekukerye-ho inyi njilamefeo.

³¹ Na inyi njimonyi njiwemwichipfo. Indi o kundu namanyike na pata ipfo ko wandu wa Israeli nkyo kindo njilechea njipatise na mṟinga.”

³² Na Yohane kawika kiṟingishyo kahamba, “Njilewona Mumuyo fo Ruwa echimsokya ai cha mbeta awuka ruwehu kacha ikaa nao.

³³ Na inyi njiwemwichipfo, indi ichu alenjiduma njipatise wandu na mṟinga nyio alenjiwia, ‘Mndu-chu ochimbona Mumuyo fo Ruwa fochimsokia fuwuka ruwehu fukamkaya nyio echiwa mopatisa na Mumuyo Mwele.

³⁴ Na inyi iwona ngamebona ngawika kiṟingishyo kyake ngahamba, ke ichu nyio Mana o Ruwa.’”

Wa kiloshionyi wa kuwoka

³⁵ Nahong'u ili lya ngama Yohane awehoṟoki-ho lingi arianyi na wa kiloshyonyi kyake wawi.

³⁶ Kawona na Yesu echikuidyaho kahamba, “Ichu nyio ihuṟuwi lya Ruwa.”

³⁷ Nahong'u walya wawi wa kiloshyonyi wamwicho Yohane adeda adi madedoho wakaoshana na Yesu.

³⁸ Yesu kainduka kawawona wa kiloshionyi waimwituma kawawia, “Iki mwipfula nkyo ki?” Nawo wakambia, “Hoi Rabi (Nakyo nyi kimu na Mlosha) nyi ku okekaa?”

³⁹ Kawawia, “Kyenjonyi muwone.” Nahong'u wa kiloshionyi wakacha wakawona hando ekyekaa wakatsinda nao mkonu fulya puti. Nalyo nyi mbe saa ikumi kyukanyi.

⁴⁰ Andrea, manomae o Simon Petro, nyi umu o walya wawi waleicho kilya Yohane ahamba wakamwituma Yesu numa.

⁴¹ Andrea kawoka iwona manomae o Simon kambia, “Lombona Mesia.” (Nakyo kokihalwo kigriki nyi kimu na Kristo.)

⁴² Kaduo Simon na alya ko Yesu. Yesu kaambuya Simon faa kahamba, “Nyi iyo Simon ui mana o Yona nolahong'u rina lyapfo nyi Kefa.” (Nakyo kohalwo nyi kimu na Petro iho lya “ngina.”)

Filipo na Natanaeli walaho

⁴³ Ili lya ngama Yesu awerie ihenda kulya Galilaya. Nalyo kakoya Filipo. Yesu kambia, “Oshana na inyi.”

⁴⁴ Na Filipo awei mndu o Betisaida, o mṟi fulya fo Andrea na Petro.

⁴⁵ Filipo kawona Natanaeli kambia, “Hoo lomekuwonya ichu amhambe nyi Mose na waikimbi, nyio Yesu o Yosefu ulya o kulya Nasareti.”

⁴⁶ Natanaeli kawesa Filipo, “A kulya Nasareti kindo kyechiwukaho kii kicha nkyo kiki?” Filipo kambia “Kenjoo-wo uambuye.”

⁴⁷ Yesu kawona Natanaeli kecha na oo ando akeri kadeda kyake kehamba, “A ichu mndu Mwisraeli o lohi; alawode mtambo ipfo mrimenyi.”

⁴⁸ Na Natanaeli kambia, “A nyi nonjimanya kuda?” Yesu kahalwo kambia, “Ili Filipo alawemekulahe kukeri alya tsindenyi ya mkuyu fulya na mbemekuwona.”

⁴⁹ Natanaeli kamhaluo, “Hoi Rabi, iyo nyi ukeri Mana o Ruwa, Iyo nyi Mangi ya Israeli.”

⁵⁰ Yesu kahalwo kambia, “Ili ngamekuwia ke nyi njiwekuwonyi kukeri alya tsindenyi ya mkuyu fulya nkyo kyakuenenga koidikya-ng'u. Nyi ochikaa nowone kyeching'anya isho.”

⁵¹ Nalyo Yesu kambia, “Na lohi na lohi ngambia, nyi mochiwona kulya ruwehu kuṟuhukye na wasu wa Ruwa wechido na isoka wekaya Mana chu o mndu.”