YOELI 3 - Bibilia Kui Mdedie fo Kimochi

Ruwa nechikapa wandu wamkambo

¹ “Kiheri kyo na mkonu yo, njechiachikia mbonyi tsa Yuda na Yerusalemu.

² Njechisanyia wa mkambo wose, na iwasotsia pichinyi lya Yehoshafati. Ipfo njechianduya wandu wo wa mkambo, ko shilya walewutia wandu wako Israeli, wai masaa hako njimonyi. Cha kipfa walewaṟaṟanja kiidi kya wamkambo, na ihawa oruka loko,

³ na ikuhawia wandu wako ko kuṟukuhya. Walekumba wanake kundu watae wameluki, na ikumba singididi kundu wahure mvinyo, na inango.

⁴ “Nkiki mkeriiwuta nyo wandu wa Tiro na Sidoni na wandu wose wa oruka lo Filistia? Ke, muwode kita na inyi mukundi itaa kiṟache? Kokoya mukeritaa kiṟache, inyi njechimutaa kiṟache oweṟe?

⁵ Muleduo fesa na sahabu tsako, mukokudika na masaa hako ha wuhuru wung'anyi, mukaduo mahekalunyi hanu.

⁶ Muleduo wandu wa Yuda na Yerusalemu kuleshe na oruka lowo na iwakumba ko Wagiriki.

⁷ Ulalu, njechiwihiṟa wandu wako na kanyi, iwuka ipfo kundu mulewakumba. Njechimutaa kiṟache ko matuuro hose mulewawutia.

⁸ Njechitewa wana wanu wa kisoṟo na wa kika wakumbo usingenyi ko Wayuda, nawo wechiwakumbia Washeba, wandu wa mkambo fo kuleshe mnu; nyi inyi Mndumii-Ruwa menyi matorito ngahamba.”

⁹ “Onguonyi mbonyi tsi ko wandu wose wa mkambo: Kuṟeheṟenyi ko shida, lahenyi ngohoda tsanu tsose, sanyienyi olemali wanu wose, wahende kusonguo kokapana.

¹⁰ Tsanenyi makumbi hanu hawe njoshu-tseweha kuwi; na mndo yanu yeweha moho iwe mapfumu. Ma mndu ulya akeri mfafa nahambe: ‘Ma inyi nyi Ngohoda da.”

¹¹ Kambienyi muche na iya nyo wa mkambo wose wamṟasa wadu, nchonyi mukusanyie ipfo mfonyi. Ee Mndumii-Ruwa! Kyeende wasikari wapfo kihadi nawo!’

¹² “Ulalu nyo wa mkambo pang'ukenyi mkuṟeheṟe; na isokia na pichinyi lyelaho nyi Yehoshafati (Mndumii-Ruwa Naianduya). Kulya, ‘Inyi Mndumii-Ruwa, njechidamia na ianduo mondu na wandu wa mkambo wose wa mṟasenyi.

¹³ Ulalu! Irenyi mashami hanu hesambuo, kipfa ulalu ni kiheri kesambuo. Idenyi napfo! Wahuonyi cha msabibu sa iichurie kiuṟi ke huuya. Wuwicho wowo wong'ana mnu na iratsia, cha shihondi shaichuo shikaitsa msanjika.”

¹⁴ Waicha kiungu kiungu kulya pichinyi lyeanduya mondu? Kipfa mkonu fo Ruwa foanduo mondu fotikiria kufui.

¹⁵ Mnengeri na meri shawa mema, na nyenyeri ntsada iwaa.

Ruwa nechiwikia mboṟa wandu wake

¹⁶ Mndumii-Ruwa naiṟuṟuma ipfo Sioni; iṟu lyake liṟuṟuma liwuka kulya Yerusalemu; ruwehu na wuyana shidedema. Kyaindi Mndumii-Ruwa nyi kidichio kya wandu wake, na nyi mṟi mwiṟihiye na omombo lo ofoṟo ko Waisraeli.

¹⁷ “Kyasia, iyo Israeli, nyo mochimanya ke inyi nyi Mndumii-Ruwa onu, njikekaa kulya Sioni, ifumvu lyako liele. Yerusalemu yechiwa mṟi foko mwele; ma wandu wa mkambo wechiidima ifukapa na ifuwingapfo.

¹⁸ “Kiheri kyo, mafumvu hechioṟa madema ha msabibu nhya, na mapo hammbe hechiwono shitonyohunyi hesotsa maruwa. Soka tsose tsa Yuda tsechisotsa mṟinga fufoi; soka yechiwuka hekalunyi lya Mndumii-Ruwa, na inosa pichi lya shitimu .

¹⁹ “Misri yechiwa njisame, Edomu yechiwa nuka ya msanga, kipfa walepufukia wandu wa Yuda; na iwaha wandu walawode mti.

²⁰ Kyaindi Yuda yechioṟa mlungana, na Yerusalemu yechikaa marika hose.

²¹ Njechikapa walya wose walepusuo samu ya wandu wa Yuda; ma njechitsuhaṟa mndu ose awode-mtipfo. Nyi, Inyi inyi Ruwa Menyi Matoṟito njekekaa Sioni.”