YOELI 1 - Bibilia Kui Mdedie fo Kimochi

Mkonu fo nzihe

¹ Ili nyi idedo lya Ruwa lilechea Yoeli, mana o Pethueli:

Wandu wasumkia iṟumatso lya Nganu na Mbeke

² Adanyienyi nyo wameku; dehenyi madu hanu nyo wandu wa oruka lo Yuda! Ngesa kulemeutika kindo cha iki kiidi ya mfiri yanu, ang'u kiheri kya wameku wanu?

³ Wiyenyi wana wanu mbonyi tsi, nawo wawiye wana wawo, nawo wawiye rika liicha.

⁴ Nzihe kisanzio ko kisanzio, tsahoya shilimu; na shilya shatsuhaṟo shikalio nyi shiwana shatso, nashilya shatsuhaṟo nyi maalea hatso shikamariso nyi mashinu hatso.

⁵ Nyo wananzi, pang'kenyi na ifihiṟa; kapenyi kelewui nyo wananzi wa mvinyo; kipfa sabibu tsose tsesungusia mvinyo nhya tsaṟumatso.

⁶ Oruka lodu lohoyo nyi mbahanyi tsa nzihe; tsiwode pfinya tsing'anyi tseṟihisha na tsifoi tsilewa iitala; maheho hatso hai maohi cha ha muiso, muhundu hatso hakeri cha halya ha muiso ya kika.

⁷ Tsamerumatsa madema hadu ha misabibu, na idapfuna mashidi hadu ha mkuyu hakawa shinana. Tsamepichuo makoko hayo na ihaombotsa wanda, na maṟamba hayo hakadeo maili.

⁸ Fihiṟenyi na isumukia cha mana mkeha aṟee nguo ya ikunyia, aisumkia kya opfu lo msoṟo awekundi imualika.

⁹ Kuwode mso ma mvinyo fo dasia hekalunyi lya Mndumii-Ruwa pfo; Makohanyi, waṟundi wa Mndumii-Ruwa, wasumukia.

¹⁰ Madema hauma hakawa nuka; oruka lukasumukia, kipfa kya ili shilimu shanyamaṟika, mfinyo yadeka, mafuda ha mzaituni hadeka.

¹¹ Wademi sumukienyi; na nyo waṟundi wa madema ha msabibu fihiṟenyi; kipfa kya ili Ngano na shayiri shanyamaṟika, na shilimu shose sha mademenyi shaṟumatso.

¹² Mashidi ha msabibu hauma, na mkuyu yanaa; mikongomanga, mitende na mitofaa yauma, ee da mashidi hose ha demenyi hauma. Sia kiidi kya wandu yadeka.

¹³ Yoeli awia wandu ṟaenyi makunyia na isumukia nyo makohanyi, fihiṟenyi nyo waṟundi wa kitaṟa kedasia. Hendenyi hekalunyi muṟee makunyia mufuhiye Ruwa kio kyose! Nyo waṟundi wa Ruwa oko. Kipfa shidaso sha shilimu ma sha mfinyo shiendose hekalunyi lya Ruwa pfo.

¹⁴ Wutenyi iwawaso wandu wakuotoye; lahenyi kisanzio kya wuindi. Sanyienyi wanene na wandu wose wa oruka, wache hekalunyi lya Mndumii-Ruwa, Ruwa onu, na ipfo mufihiṟie Mndumii-Ruwa.

¹⁵ Ochia lodu kya mkonu fulya fo Mndumii-Ruwa, mkonu fulya fo Mndumii-Ruwa fotikiria; fuicha handu hamu na orumatso, fuwuka ko Mndumii-Ruwa.

¹⁶ Shilimu shadu sharumatso lochiambuya. Kuwode sia na shiseko hekalunyi lya Mndumii-Ruwa odu pfo.

¹⁷ Mbeu tsaumia huya teri injihadutsu; kuwode shelya shewika shikumbinyi- pfo, shikumbi shanyamaṟika, kipfa shatuṟa shilimu shewika pfo.

¹⁸ Mbe tsikeri iana wukiwa kipfa ili kulawode kelya kyatso; mapo ha machondi naho hakeri ifihiṟa wukiwa.

¹⁹ Njikufihiṟia iyo, Mndumii-Ruwa, kipfa modo foongoṟa madema hadu, olewo lo modo lorumatsa mashidi ha mademehu.

²⁰ Ma mando ha ngeṟa haikufihiṟia iyo Mndumii-Ruwa, kipfa soka tsa mṟinga tsaumia, modo fokombetsa shelya sha shuma patenyi.