YOBU 9 - Bibilia Kui Mdedie fo Kimochi

Yobu ahaluo

¹ Kiidima Yobu kahaluo;

² “Ikyo na lohi da, kyaindi nyi wuda-mndu echiidima iwada wusumhanyi oshangunyi lo Ruwa?

³ Kokoya kuwode mndu echiidima ihodana nao, echihenda haleshe pfo, ma ihaluo iweso limu kiidi kya kiku-pfo.

⁴ O nawode wuṟango wumg'anyi na pfinya, nyiu alemelyimbana nao kawinga?

⁵ Nekeiramafumvu halakuichi, kahawunduya kuleshe kwi nyashi yake.

⁶ Nekededemisha oruka lukadihina, na ngo tsalo tsikadedema.

⁷ Nekewawasa mnengeṟi fulado, ka weima nyenyeri tsilawae.

⁸ Nao amonyi aletsiala nginehu, kawechumia masinanu ha ipalyipalyi.

⁹ Nyio alewika nyenyeri ipfo nginehu, na nyenyeri tsa nuka.

¹⁰ Nekewuta ngata tsing'anyi tsilamanyikie, mbonyi tsing'anyi tsilewa iitala.

¹¹ Apaa! Nekeida kufui na inyi njilambone, kawehenda njilaidime immanya.

¹² Keambuya! Nekeduo kindo akundi, nyiu echiidima imiima? Ang'u nyiu echiidima imbesa: ‘Kiki uiwuta!’

¹³ “Ruwa echiidima iima nyashi yake-pfo; Rahabu na watarami wake wahongoma ko wuowu.

¹⁴ Na njechiidima ihaluo Ruwa kindo? Nyiku njechisambuṟa madedo hembia?

¹⁵ Ma chandu ndawode mti, njechiidima umhaluo-pfo Kiwaṟi njiterewe osaṟio ko ichu anjikumbie.

¹⁶ Ma kokoya njiwemlaha nao kanjihaluo, njiwechidiima iidikia ke nanjiadanyia-pfo.

¹⁷ Nanjipoṟipotsa kwi mkuma; kaengeṟa shifaṟe shako tare kita.

¹⁸ Anjileka njidose moo-pfo, ohendo loko lo moo naluichuṟie mawawio.

¹⁹ Kokoya nyi ilyimbana, o nawode pfinya ing'anyi; Na kokooya nyi ishiha wulohi, nyiu echimeende na mengenyi?

²⁰ Ma chandu ulawode tewe, madedo hako, hamenyi hawenjianduya; ma chandu ndawode deko, nyi wechiwio nyi makideko.

²¹ Njii mwisaluche pfo, njikung'anyishie-pfo. Ngasuo ohendo lo moo foko.

²² Shose nyi kimu tupu, ko ikyo ngahamba, Ruwa nechikapa na imarisa wecha na wawicho.

²³ Ndenga tso tsikaende njopfu tsa kitusu, walawode mti fo ndenga wechiseka.

²⁴ Oruka lukawada wandu wawicho, wuitoṟinyi wo wawicho. Ruwa nekeshinga meso na weanduo mondu kokoya alai o nyiu ekewuta ado?

²⁵ “Mfiri yako yasia cha mowikia mteeṟa; yadicha kulawode kiira.

²⁶ Yawikia mteṟa cha meṟikebu yekedicha, cha-mbeṟo irundikia kando-kayo.

²⁷ Ngahamba: ‘Njechihadima kieṟeṟo kyako, njiwuteho kyamu kyako kya fowa njiwade sia!’

²⁸ Indi njiowoye mawawio hako hose, kipfa njiichi Ruwa echinjiwona ke njiwode mtipfo.

²⁹ Kokoya njechianduyo ke njiwode mti, kitewe njikulise wukiwa wulya nki?

³⁰ Njiwekusanja na kuṟeṟa, ngasamba na sapunyi.

³¹ Manya kudo nechinjikumba rinenyi lyiichuo oko, na maṟao hako hechinjitewa njiṟahoṟo nyi moo.

³² Kyaindi Ruwa chi mndu cha inyi njiidime imhaluo-pfo, ang'uluhende nao mengenyi kimu-pfo.

³³ Kuwode mndu moletsana kyadu-pfo, awechidumbuo kyadu so wawi-pfo.

³⁴ Ruwa nanjiwute olyiio lo lonjikapa, na iowesha lyake lilanjiendie madima!

³⁵ Ma kudo njiwechiidima ihamba kulawode imuowuo Kipfa njii njido kiidi kyako-pfo.”