YOBU 8 - Bibilia Kui Mdedie fo Kimochi

Bildadi

¹ Naalyo-Bildadi Mshuhi kahaluo Yobu kechimbia:

² “Nochideda madedo ha noshike indii? Madedo hapfo hechiwa ha wulya cha otanu mṟasa indii?

³ Nokusaṟie Ruwa nedetsa wulohi? Ang'u Ruwa-chu mopfinya nehamba wongo?

⁴ Kokoya wana wapfo waledekio Ruwa, nawataa kirianyi na wuwicho wowo.

⁵ Kokoya oshiha Ruwa, koweterewa Ruwa-chu mopfinya,

⁶ na kokoya iyo nyi-ui menyi wusumhanyi mrimenyi, na kya lohi Ruwa nechicha ikutarama, na ikuinenga handu heonyonya hawaṟi.

⁷ Ma chandu ulewoka na wukiwa, kyaindi lyefurumia nyi ochiwada kiṟumi ngoseṟa.

⁸ Hoi kulaterewo keluloshe ko walya wawesonguo, uwewada mbonyi tsilya waku wadu waletsimanya.

⁹ So nyi wandu wa wukowu tupu, luichi kindo-pfo; mfiri yadu ii cha kiṟinje kiida.

¹⁰ Indi wo wechilulosha na ikuwia, mbonyi waletsiwona na itsiwada kiidi kya wuṟango wowo.

¹¹ Mawiriwiri hekedo handu hawode mṟinga Liliwu ya nuka handu ha mṟingenyi.

¹² Ma kokoya hakumbia na iwaṟa kulawode mndu-ahamanya, hakatuṟa mṟinga, hekenaa oweṟe kota hengi.

¹³ Nyi wudo wai wose wahadimie Ruwa, kikusirio kya walaidikie Ruwa kechideka.

¹⁴ Mkusirie fowo fokefunjikafunjika, na kilya wakusirie nyi orusu lo mbuhu.

¹⁵ Wekekuihetsa na mba yawo indi-ilahoṟoke, wakaishihika ilalae ko mlungana.

¹⁶ Kafanana na ikidi lyiwishi, kukawaa mbaṟi o kaleheka; kaweaṟanja maṟamba hake mdemenyi koke.

¹⁷ Mri yake ikakuokaoka kiidi kya maho, nao kahenda iṟisa kiidi kya iṟaṟa.

¹⁸ Indi kashika irumatso wuka handu hake, shoshe shechimleha na ihamba: ‘Njilemekuwone mantanyi.’

¹⁹ Ifo nyifo mtsitsionyi fo sia ya mndu cho, handu hawo kochioṟa wengi.

²⁰ “Ambuya Mndumii-Ruwa ekeleha wandu wa wusumhanyi pfo, ma itarama wanyamaṟi pfo.

²¹ Indi nechiwaichuṟa seko, na maṟu ha sia madumbunyi hawo.

²² Walya wakusuo wechihoyo nyi sonu, na kanyi ko wawicho kochideka.”