YOBU 7 - Bibilia Kui Mdedie fo Kimochi

¹ Mndu o wandu nawode matuuro wuyanenyi, mfiri yake ii cha ya mndu o iṟunda lyetao mkonu naafo!

² Nafananyi na isinga lilangie kiṟinje, cha mndu eketao ifurumia lya meri, chandu ekewedia na macha wueri woke.

³ Kyasia njimteṟie meri, na meri ya kiwi, kyako nyi ifuha orio kio tambaṟu, kulawode isia moo.

⁴ Kokooya ngalaa njekehamba “Njechikure indii?” Kipfa kio kyekyewono kikileshe; njechikuhaluo haluo kitaṟenyi mṟasa kuke.

⁵ Mbihu foko fuichuo matambacha na oko, njonyi ya mbihu foko injihadutsu iwode ofia lo ude.

⁶ Mkonu yako idicha cha kidenga kya mopfuma nguwo, ikaweshikia mtsitsionyi kulawode mkusiṟie.

⁷ Moo foko iya wuyana nyi mṟufu tupu, riso lyako lyechiwona kicha kyose-pfo.

⁸ Icho anjiwonyi wulalu, echinjiwona-se-pfo, kioweṟe kitutu konjiambuya, njedeka-deka ulechinjiwona.

⁹ Chandu ipuchi lyekesalaa na ideka, na wudo wandu wai ili wechisokia ko Waṟumu kulawode iwuya.

¹⁰ Mohenda-echiidima iwuya kishari kyake-pfo, na alya handu awekekaa kokehadimo aweṟe.

¹¹ “Njechiidima iima dumbu lyako ideda-pfo, njechideda kya matuuro ha mrima foko, njechifihiṟa kya mawawio ha mbihu foko.

¹² Inyi nyi ipalyipalyi ang'u indo lya ipalyipalyi, itane onjiwikia mṟingi?

¹³ Kokoya ngahamba, ‘Njechisia moo kitaṟenyi, na nguwo tselaaya tsenjianguṟia mawawio.’

¹⁴ Ndodo tsechinjiowesha, na isho shewono shikanjiwuta madima.

¹⁵ Mahio hako hakalanga njikuotsuo, na isambuṟa opfu kota mawawio ho hako.

¹⁶ Njilehela ma njechikaa na moo mfiri yosepfo; Wanjilise wukiwa, kipfa mfiri yako yamaiida.

¹⁷ Ngesa, mndu nyi kiki, umṟumishe, nowembika mahiyonyi hapfo.

¹⁸ Koemwaambuya orio ngamenyi, na imhesha orio kiheri?

¹⁹ Kowenjiambuya manya otsitsapfo, ma kulade njimeṟe mada kipfa kya wukiwa?

²⁰ Kokoya ngawuta wunyamaṟi, kikuwodie kita kiki iyo moringa wandu? Nonjihaluo njiwe ṟuko lyeṟunga. Itane ngawa mhanda fo mrima fopfo?

²¹ Kitewe okenjihoṟia madeko hako, kowenjiletsa na mawicho hako? Ambuya wulalu njilaa kilulinyi; Na iyo nochinjishiha mnu, kyaindi njechikooyo-pfo.