YOBU 6 - Bibilia Kui Mdedie fo Kimochi

¹ Kyasia Yobu kahaluo Elifasi:

² “A kima iawo-nyi-moo-foko fuwechihesho wulemeri wofo, wukiwa woko wukawewiko kiheshonyi!

³ Shiwechikoyo shilemeri kota, msanga fo wambaṟa ya ipalyipalyi. Nkyo kyainenga ngadeda woṟemka!

⁴ Ee da mfi ya Ruwa menyi pfinya yanjitocha; Mbihu foko fonyo wuṟoi wofo. Iowesha lya Ruwa lyaanjikumbuhana.

⁵ Ngesa nzoi ya ngaṟenyi yefihiṟa iwode maṟa, ang'u mbe yeana kuwode kando?

⁶ Ngesa, kindo kilawode mlodo, Kechiwa ilyio kulawode monyo? Ngesa, oruwo lo ipoṟe luwode mlodo fose?

⁷ Njiwode lango yepaaya shelya sho-pfo, Isho nyi shelya shako shiwichuṟie.

⁸ “A kima mbeidikiyo kiterewo kyako, Ruwa kanjiinenga kilya njilangie;

⁹ Ke nawechikunda injipoṟipotsa, nawehoṟuo owoko loke nanjiarise kuleshe!

¹⁰ Njiwechiwihiṟiyo moo na ikesa kiidi kya mawawio hako halawode isaṟia.

¹¹ Kyaindi njiwode pfinya yehenda mbele pfo; njiichi mtsitsionyi foko fui fuda-pfo, kundu njiidime ikarishia.

¹² Ngesa, pfinya tsako tsi cha tsa maho? Ang'u mbihu foko cha aṟeṟa?

¹³ Lohi, njiwode kenjitarama-pfo; wutarami wose lowuka koko.

¹⁴ “Moleha isaṟia mbuya yako, naleha iindia Ruwa menyi pfinya.

¹⁵ Mbuya tsako wanjilemba cha kimeda, wakanjitaluo cha mfongo ing'anyi ilawode mṟinga.

¹⁶ Iichuo manzaho, na kuṟeṟa, ikashikio masaho maumu

¹⁷ Kiheri kya mrike shikadeka, kiheri kya kwari meda ikauma.

¹⁸ Njokondo tsa wandu tsekededa tsechishiha mṟinga, wedo na ikyama na ipfia ipfo nuka ya msanga.

¹⁹ Njokondo tsa Tema weshihashiha, wa kyaṟo wa Seba wekusiria.

²⁰ Wekesuo kipfa kya kikusirio kya wulya, wekeshikia shimeda-sho na iichuo nyashi.

²¹ Nyo nyi mfananyi cha shimeda-sho, muwonyi wukiwa woko na iowuo.

²² Ngesa, ngamehamba munjiinenge shindo-sha-nnga? Ang'u munjitsutsume ko masaa hanu?

²³ Ang'u munjikiṟe njaenyi tsa wakituwa? Ang'u munjitalae mawokonyi ha wakika?

²⁴ “Njiloshenyi, na inyi njitsie. Njiloṟenyi chandu ngadeko.

²⁵ Madedo ha lohi hawode pfinya ing'anyi! Kyaindi ideda lyanu hanga lyanjiloṟa?

²⁶ Ngesa, mokusaṟa mochiidima injiwonyia mti fo madedo? Madedo ha mndu ahusie macha, inyi kimu na otanu tupu.

²⁷ Nyo nyi mkokekaria ikapia wangoeda kuṟu kuhya; mukawekaria iwesia wambuya wanu wahuṟo!

²⁸ Kyaindi njiambuyenyi mulaterewo, Njechikaria ihamba wongo oshangunyi lonu-pfo.

²⁹ Wulalu-le, lekanenyi na wuwicho, lekenyi wulalu, kipfa inyi njii mhoṟotsu.

³⁰ Ale, mokusaṟa kulako ngahamba owicho? Ale, mokusaṟa njilaichi mawawio?”