YOBU 5 - Bibilia Kui Mdedie fo Kimochi

¹ Kelaha uwone kokooya kuipfo, mokuidikia. Nyi uhya owaele ochimlaha?

² Na lohi-da itambahana lyewaaha tondo, na wunyenyi wochirumatsa alai na wuṟango.

³ Njilemewona tondo lyechiwada wusuṟi, kyaindi oweṟe ngasesa handu hake.

⁴ Wana wake wawode ofoṟo pfo; wekewonyio mengenyi, ma kuwode mowadedia wuchapfo.

⁵ Kilimu kyake kelyio nyi wawodo ny njaa, ma kilya kya mso kidooye kiidi kya osha; wenyi lango wemeṟia mada wusuṟi woke.

⁶ Matuuro hekewuka kilulinyi pfo, na wukiwa wochiahika terinyi pfo.

⁷ Indi mndu o wandu nekefeo nalye wukiwa, cha sese tsa modo tsekerunduka huye.

⁸ “Kimanjiwei iyo, njiwehalukia Ruwa, njiwechidambikia Ruwa mbonyi yako,

⁹ o ekewuta maṟiho, halekewa isonjokoṟa, ekewuta manene halekewa iitala,

¹⁰ mvuoyekenosa oruka, na iduo mṟinga mademenyi.

¹¹ Nekeiria huye walya wafafa, na wekapa kilio wakawona olele.

¹² Nekefurunja mahio ha wenyi mtambo, mawuto hawo halaiṟimiṟe.

¹³ Nekewada wenyi wuṟango kwi-mtambo-yawo, makusaṟo ha wenyi mtambo kahatoromesha-oweṟe.

¹⁴ Iwo wekewona meema kiheri kya mfiri, ruwa lyishimbiki wakawadawada cha ilyi-nyi kio.

¹⁵ Kyaindi Ruwa nelekiṟa wangoeda walawooho, kaweashuo wakiwa mawokonyi ha wenyi pfinya.

¹⁶ Ko ikyo wakiwa wawode kikusirio, na wuwicho wotsitsa.

¹⁷ “Nanga ya ulya ekekapo nyi Ruwa! Ko ikyo ulamine ili Ruwa menyi pfinya akuhoṟuo.

¹⁸ Kipfa o nekewawiṟa kawechiṟa;

¹⁹ Nechekuashuo kiidi kya ngataṟa sa-kafoi; Kiidi kya wuwicho wo ifurumia, wunyamaṟi wochikupaaya pfo.

²⁰ Nechikukiṟa na opfu kiheri kya njaa, Kiidi kya ngapano njiwawo nechikukiṟa.

²¹ Nochiringo kipuo na ngapano-ya olimi, ma ochiowuo ili osaramayo lochichapfo.

²² Osaramayo na njaa shikacha, nochiseka, ma ochiowuo mando hai na moo orukenyi malang'a pfo.

²³ Mochiidikiana na maho hai mdemenyi, na mando malang'a hewada ofoṟo na iyo.

²⁴ Nochiwona kanyi kopfo kui olele; noweambuya shuma shapfo koshiwona shiipfo-shose.

²⁵ Oshari lopfo luwepfumbuka, wafo cha maṟa ha mdemenyi.

²⁶ Nochipfa uwode maka ifoi ya wuku, cha mhanda fo Ngano njikapekape injiumu-necha.

²⁷ Kyasia iki nyikyo luleambuya na iṟisa; nyiwulohi-da; uadanyie na imanya kiwe kiira kyapfo.”