YOBU 42 - Bibilia Kui Mdedie fo Kimochi

¹ Kiidima Yobu kahaluo Mndumii-Ruwa

² "Njiichi ke nochiidima orio kindo kyose uṟeheṟie kuwode mokuimapfo.

³ Nulehamba ke njilekaria itirimisha shilya uweṟeheṟie kwi wutondo Na lohi njilededa kindo njilakiichi mbonyi njilemeri mnu koko njilawetsiichi.

⁴ Nyi ulenjiwia njiadanyie na iyo nyi ochinjiwia ke nochinjiwesa na inyi njikuhaluo.

⁵ Na lohi njileicho mbonyi tsapfo ko madu tupu, indi wulalu njikuwonyi kwi meso hako njimonyi.

⁶ Ko ikyo matumatu hamu na ikushia kiluli na ifu, ngakuwona inyi njimonyi chi kindo-pfo."

Mtsitisonyi

⁷ Mndumii-Ruwa kekimaa ideda na Yobu, kawia Elifasi mtemani, “Nyashi yako yaaka huyapfo na mbuya tsapfo tsiwi kipfa mulededa wulohi na wusumhanyi woko inyi cha mṟundi oko Yobu chandu alewuta-pfo.

⁸ Ko ikyo duonyi mapung'a mfungade na masuwa mfungade, muhende ko mṟundi oko Yobu, muwute mwano fomanya modonyi kipfa kyanu. Na mṟundi oko Yobu nechimuterewia, na inyi njechiadanyia kiterewo kyake, na inyi njechida njilamuwutie kihiyanyi na wutondo wonu, kipfa mulededa kya lohi kinjiwaṟi chandu mṟundi oko Yobu alewuta-pfo.”

⁹ Kyasia, Elifasi Mtemani, Bildadi-Mshua na Sofari Mnaamathi, wakawuta chandu Mndumii-Ruwa alewawia. Mndumii-Ruwa kaambia kiterewo kya Yobu.

¹⁰ Yobu kekimaa iterewia mbuya tsake Mndumii-Ruwa kawihiṟia Yobu chandu awewode mawookioyi. Kamneenga kawi ko orio kindo awewode ilyi kuwooka.

¹¹ Kiidima wana wa mae, wachili wake na mbuya tsake tsose wawemiichi ilyi kuwoka wakahenda kanyi koke, wakalya kelya hamu nao. Wakambia haiye na imbihiṟia moo kipfa kya wukiwa wose Mndumi Ruwa alemwendie. Orio umu owo kainenga Yobu fesa na rachi ya sahabu.

¹² Kiidi kya maka ya Yobu ileosha Mndumii-Ruwa kambikia ona kota ilya kuwooka. Kyasia Yobu kawada machondi shiku ikumi na shiina, ngamia shiku shiṟandaṟu, mbe shiku shiwi na nzoi njika kiku kimu.

¹³ Nawewode wana wa kisoṟo mfungade na wa kika waṟaṟu.

¹⁴ Mana oke o kika o kuwoka nalemlaha rina Yemima, na okawi Kesia na mfurumi Keren-hapuhu

¹⁵ Ipfo orukenyi kose kuwewode wana wa waka wecha kwi oshangu cha wana wa Yobu-pfo. Ndeawo kawainenga shooṟa shawo chandu aleinega wasacha wawo.

¹⁶ Kyasia Yobu kainengo maka ihana na makumi haana (140) ohendo lo moo, kawona wachuku na njukuṟi itane kishari kya kaana (wana, wachuku, njukuṟi, njukuna).

¹⁷ Naho Yobu kapfa amku amaye maka ifoi.