YOBU 40 - Bibilia Kui Mdedie fo Kimochi

¹ Mndumii-Ruwa kaengeṟa ihaluo Yobu na-ihamba

² "Ngesa, msa awode mdambuye nechihodana na Mndumii-Ruwa? Nalahaluyane na Ruwa, nao namhaluo!"

³ Naalyo Yobu kahaluo Ruwa na ihamba:

⁴ "Ambuya inyi chi kindo-pfo njikuhaluo-ki? Ngawika owoko loko aa-dumbunyi lyako.

⁵ Ngadeda lyimu tupu, na inyi njechihaluo-pfo Ee-da, ngamededa kawi, njechiengeṟa-se-pfo."

⁶ Naalyo Mndumii-Ruwa kahaluo Yobu kiidi kya otanu lokiwiwiṟi na ihamba,

⁷ "Kupfnge kitsi cha msoṟo Inyi njechikuwesa idedo na iyo nonjiwia.

⁸ Ngesa, na mwanduye foko nochefuilacha? Nochinjiwonyia owingo, kundu uwade wusumhanyi.

⁹ Ang'u ngesa nowode owoko cha Ruwa? Na ocheidima iwuta ṟu lyeringo na chao?

¹⁰ "Kyasia ṟaa wulalu wusuṟi na wunene kuchope wuitoṟi na wuikolonyi.

¹¹ Letsa mpuiko fo nyashi yapfo uambuye orio mndu mokudosa nomsotse.

¹² Ambuya orio mndu o orikiki umsotse uchume wawicho handu wahoṟoki.

¹³ Waṟike kilulinyi handu hamu woshya shamu shawo handu ha-kisekenyi.

¹⁴ Naalyo inyi njechiidikia mbonyi tsapfo ke, owoko lopfo lo kulyo loidima ikukiṟa.

¹⁵ "Ambuya imolyimo lyo lelaho kiboko njilelyiumba hamu na iyo. Lyekelya maṟa cha mbe.

¹⁶ Ambuya pfinya tsalyo tsii ipfo kitsinyi kolyo na wuidimi wolyo wui kiidi kya mri ya ndewu yalyo.

¹⁷ Lyekepayapaya mṟehese folyo cha meresi, mri ya shinama shalyo ikusanze handu hamu.

¹⁸ Mafuo halyo hai cha maṟi ya aṟeṟa, mbari tsalyo cha shiteeno sha menya.

¹⁹ "Nyi lying'anyi kwi njia tsa Ruwa! Icho alelyiwika nalelyiinenga oshu loke.

²⁰ Na kya lohi mafumvu hembonyia-kando Handu mando ha patenyi hetemia.

²¹ Hekelaa wanda ya mashidi hawode maṟa kundu ko maowionyi manzinyina shirohorohonyi.

²² Mashidi hawode maria hakashikia kwi maria haho shimfongo sha shimeda shikaṟingichia.

²³ Ambuya, ma meda fukasoka, lyededema-pfo lyikuwonyi lyii olelenyi, ma Yordanyi fokesoka wokia oṟoonyi.

²⁴ Ngesa, mndu nechiliwada lyiwonyi Ang'u itocha mbuo yalyo na sumi?