YOBU 4 - Bibilia Kui Mdedie fo Kimochi

Madedo ha Elifasi

¹ Kiidima Elifasi Mtemani kahaluo Yobu:

² Ngesa mndu kahesha ikuwia, idedo nochisuo? Kyaindi nyiu echiidima itsia alechideda?

³ Adanyia njikuwie oloho! Iyo nyi ulelosha wandu wafoi, kowanza-mawoko ha wanadu wafari.

⁴ Madedo hapfo hakaira wandu wawepfiie mrima, Kowanza wandu wawewuṟie, pfinya.

⁵ Wulalu shakukooya, na iyo ulaidime itirisia, shakukooya shikakupaaya na iyo, ate noawo nyi moo.

⁶ A iindiya Ruwa chifo mkusirie fopfo? Na wuhoṟotsu wopfo chifo mbedie fopfo?

⁷ Kusaṟe nyiu alawode deko, Alemesaramaya? Na wahoṟotsu walemekumbo.

⁸ Inyi kindo njiichi, wewaaya wuwicho, wechesambuo iwonyio.

⁹ Ruwa nekewarumatsa wose Kwi mṟufu foke, iwo wose wechisenekia kwi ngapo ya nyashi yake.

¹⁰ Wawicho wekepoṟohoṟa cha muiso mlang'a, indi maheho hawo hekefunjo.

¹¹ Mwiso fuwode pfinya fokepfa fuwuṟa kewada, na malea ha mwiso njika hekerahanyitso!

¹² Mfiri fumu, njilewio idedo kwi kiṟika, kudu koko kuleicho kiwewedo.

¹³ Njii kiidi kya makusaṟo ha ndodo tsa kio, Kiheri wandu wawodo nyi mado malemeri.

¹⁴ Njilewuko nyi madima na idedema, mafuo hako hose hakakapana.

¹⁵ Otanu lukawiwita kyaamunyi kyako, njui tsa mbihu foko tsikahoṟoka tsimonyi.

¹⁶ Oshangunyi loko kukahoṟoka kindo kitsie do, njikiambuya njilakimanye ma nta. Kukawewada kindo kiwode umbo njiliwe oshangunyi loko. Kukaho olele, nduma ngaicho ṟu.

¹⁷ Mndu o wandu kapfa, nechiidima iwa mhendeli kota Ruwa?

¹⁸ Manya ma waṟundi wake, Ruwa awaidikiepfo; na wamalaika wake nekewawona wai-wadeko;

¹⁹ aka nyi wuda mndu o wandu ai teri; wandu wawukie kilulinyi, wecheidima ipaṟopaṟo cha kihuhuna!

²⁰ Kioweṟe sa kitutu mndu, nechiidima isaramaya; wechisaramaya mlungana kulawode, ma kiacho kyawo!

²¹ Kokoya kuwode-orusu lokewada moo fowo lukadumbuyo wo wekepfa wawode wulaanyi.