YOBU 39 - Bibilia Kui Mdedie fo Kimochi

¹ Ngesa na uichi kiheri kya mburu tsa nja tsi ngaṟahambenyi ha maho mandi tsechishaa? Ang'u kiheri kya sariha?

² Ngesa noidima itala ke nyi meri inga yechishika? Ang'u nyi kiheri kiha tsechishaa?

³ Tsekehongoma, tsikashaa wana wawo wakalekana na wukiwa.

⁴ Wana wawo wekekaa necha, wakang'ana handu ha patenyi wakahenda, ma walawuye se.

⁵ "Nyiu aleduo itiko lyihende lyikuachie? A nyiu alepfunguo shipfunga sha itiko?

⁶ Ichu njilemneenga nuka iwe kanyi koyo? Na oruka lo monyo kuwe handu hayo kokaa.

⁷ O nyekemina mtiṟi fo mṟi, Ma ekeicho kifahio kya mohoṟokia -pfo.

⁸ Wulandari wo fumvu nyi handu helya, Likewalya orio kindo kiwishi.

⁹ "Ngesa, mboho yechekunda ikusingia ang'u, ikae mfiṟihenyi kopfo?

¹⁰ Ale, nochiidima ipfunga mboho matutenyi? Ang'u yechidema mapichi-numa yapfo?

¹¹ Ngesa, nochimkusiria kipfa kya pfinya tsayo? Ang'u nochimdea iṟunda lyapfo?

¹² Ngesa, nochimkusiria ke nechiende mbeu kanyi nasanyie kilimu kyapfo handu hehuuya?

¹³ Ikungo lya nyaha lyekechihiyo kyaindi makungo halyo na mberi tsalyo tsekesaṟia.

¹⁴ Yo yekewika mapoṟe huya teri kahakoṟa na mlelya.

¹⁵ Ikahadima ke hechiidima ipaṟo nyi odende loyo, Ang'u indo lya ngeṟenyi lyihachume.

¹⁶ Ikawa njiwawo ko malea hayo, cha ilyi halai hake; ma chandu ilelya wukiwa wo maai, injiowonyi;

¹⁷ Kipfa Mndumii-Ruwa naleiima wuṟango alainengo manya wulaanyipfo.

¹⁸ Kiheri ikuiria huye ihende, yekemina frasi na icho aidooye.

¹⁹ "Ngesa, nyi iyo uleinenga frasi pfinya tsayo? Ngesa nyi iyo uleṟika frasi mberi tsa nzingonyi tsidedeme?

²⁰ Nyi iyo ulemhaluo narunduke cha nzihe? Wusuṟi wo ṟu lyayo lyaṟihisha!

²¹ Lyekeṟaha ṟaha pichinyi na ikuchihiṟo nyi pfinya tsayo Ikakure ikahenda ikooyana na menyi shisha.

²² Lyeketema na wusalaṟi, ma lyeṟihiyo-pfo ma ihaluka nduma kipfa kya oshu.

²³ Shaha yekefahya pfumu lyiohi na opanga.

²⁴ Lyekemeṟa oruka kwi nyashi njiwawo; ma yechihoṟoka ma kokapa taṟumbeta-pfo.

²⁵ Orio mandi taṟumbeta yekapo ikahamba “Ahaa” yekieicho mpfaamo fo shida wuka kuleshe mtiṟi fo wachilyi na kifahiyo.

²⁶ "Ale, mbeṟo yekerunduka kwi wuṟango woyo na ihoṟuo makungo hayo iambuya ora lo nuka?

²⁷ Ale, owishi lohenda huye kwi wuwawaso wopfo na iwika sungu yake handu hakuirie?

²⁸ Yekekaa ngaṟahambenyi, nyipfo kolaa huye ya ngaṟahamba na otiṟiwenyi.

²⁹ Wuka huye o nekeimehiya kilya awada meso hake hakaambuya nuka kuleshi.

³⁰ Malea hake naho hekeonga samu handu kuwode mnying'a mpfu."