YOBU 38 - Bibilia Kui Mdedie fo Kimochi

Ruwa ahaluo Yobu

¹ Nalyo Mndumii-Ruwa kahaluo Yobu ai kiidi kya kiding'ashi.

² “Iyo nyi ukeri ipfuluo mawawaso na makusaṟo hako kwi madedo halawode wuṟango?

³ Karishia cha msoṟo nyi njikuwesa na iyo nonjihaluo.

⁴ “Nyi ku uwekeri lilya njiwesuma otende lo oruka? Njiwia kokooya nowode wuṟango.

⁵ Nyiu alewika wuleshe na wulandari woyo, kofia noichi! Ang'u nyiu alelaṟa oruka keshihesha?

⁶ Ngesa, ngo tsa oruka tsihoṟoki huya kiki, ang'u nyiu alelaṟa-oruka kechihesha?

⁷ Kiheri nyenyeri tsangamenyi tsiwei iimba kimu, na wana wa Ruwa wawemiichika ko sia?

⁸ “Nyiu aleshinga mamṟinga halya ha ipalyipalyi kiheri haleṟuhuka na ihuma hawuka njoṟoonyi tsaho?

⁹ Nyi inyi njileshikia ipalyipalyi- kwi mapuchi ngawewika ho mema rambatanyi.

¹⁰ Njilewikia ipalyipalyi mṟasa, ngalyiima kui sombo na mongo.

¹¹ Ngalyiwia: 'Mtsitsionyi fopfo nyi iya, chi ngoseṟa-pfo! Masinamu hapfo ha pfinya hechitsitsa iya!'

¹² “Yobu, wokia ofeo na ulemewawasa kukye? Na otuko lumanye handu hayo

¹³ kundu luidime iwada wuyana na membe yake na ifuna wawicho-wo waipfo?

¹⁴ Wuyana wokehaluka wukawada fana cha nguwo, chandu teri yeumba shihiya yekehalutso na kitisiṟo.

¹⁵ Kyaindi wawicho wechiimo sa yawo, owoko lukuṟeheṟie ikapa wandu lochifunjo.

¹⁶ Ale ulemeshika sokenyi tsa ipalyipalyi? Ang'u ichumia huya oṟoo lo ipalyipalyi?

¹⁷ Ulemeloṟo shichumi sha opfu, ang'u-shichumi sha kanyi ka mema-rambatanyi?

¹⁸ Ale, na uichi wuyana chandu wung'anyi? Njiwia kokoya na uichi isho shose.

¹⁹ "Nyi hanga sa yekekaa? A kanyi ko meema nyi hanga?

²⁰ Kundu nofuduo handu hafo na imanya njia yehenda-pfo.

²¹ Iyo kikuwaṟi umanye, iyo umneenge ohendo lo moo lo maka ifoi!

²² “Ngesa, ulemeida kikumbinyi kya theluji, ang'u iwona kikumbi kya mvuo ya manzaoho.

²³ Njisuṟumie kipfa kya mkonu ya ngataṟa, kipfa kya mkonu ya ngapano na shida?

²⁴ Njia yehenda handu sa injihawe nyi iha ang'u ipfo kundu otanu lo ora lo ngamenyi lukaalo wuyanenyi?

²⁵ “Nyiwu aletaṟucha nginehu okondo lo mvuo? Nyiu aleloṟa ikuṟuṟuma okondo loke mapuchini.

²⁶ Ikatewa mvuo ikape orukenyi kulawode mndu na nuka ya msanga kulawode-pfo mndu.

²⁷ Kundu iwihiṟie moo wanda njiumu na oruka lo kwari kundu luidime ioṟisha maṟa?

²⁸ “Ngesa, mvuo iwode ndee? Nyiu alefee matacha ha mlewi?

²⁹ Ngesa, mṟinga fui iho fuwukie ndewunyi yawu? Nyiu alefee theluji?

³⁰ Mṟinga fokewa muumu cha iho, na ipalyipalyi naawo.

³¹ “Ambuya po lya nyenyeri Ngesa, noidima ipfunga Kilimia na mshe, ang'u ileheṟuo shipfungo sha Orioni?

³² Ngesa, nochiidima iloṟa nyenyeri kiheri kyatso ang'u Ngaṟe hamu na malea hayo?

³³ Na uichi mapfundo hekeitoṟia ngina: Ngesa, nochiidima isaya mbonyi tsayo orukenyi?

³⁴ “Ngesa nochiidima ilaha na ṟu ling'anyi na iwawasa mapuchi hashinge chandu mvuo yasoka?

³⁵ Kowawasa owaṟuko luwaṟe lokuchea na ihamba: 'Nyi iya njii?'

³⁶ Nyiu alelosha ilaha “kwaṟaṟa” kya iichuo lya meda fo Nili. Ang'u kawia ilong'oi ke kuicha mvuo?

³⁷ Nyiu awode wuṟango woidima itala mapuchi, ang'u ihongomitsa selela tsa mṟinga ipfo ruwehu?

³⁸ Kundu kiluli orukenyi kiwadane na teri kundu kuwade odoko?

³⁹ "Ngesa, na ochiidima ilasia mwiso nyama ang'u ipeletsa malea ha mwiso."

⁴⁰ Ili mandi haowie mbakonyi koko, ang'u ilaa maowionyi ili hailaaya?

⁴¹ Nyiu ekeinenga makuru kando kaho, ili malea haho hanjifihiṟia inyi Ruwa, na irundukarunduka ipfo na ipfo kipfa kya njaa?