YOBU 37 - Bibilia Kui Mdedie fo Kimochi

¹ Kipfa kya isho, ngoo yako idedema, ikaitola handu hayo.

² Adanyia iṟuṟuma lya ṟu lya Ruwa, na mangalili ha ṟu lya dumbu lyake.

³ Lyekeichio orio handu shi ya ruwehu owaṟuko loke lukawaṟa njora tsose tsa oruka.

⁴ Nalyo ṟu lyake likaṟuṟuma, ṟu lyake lykadungana kwi kiṟumi kyake mandi-ho mbaṟuko tsake tsikalyimika lyimika kose.

⁵ Ruwa nekepafuo makuṟuṟuma haoweshie kwi ṟu lyake, nekewuta ngata tsing'anyi tsilechiidimika imanya.

⁶ Nekewia mṟinga, fo rauṟa ya makuṟeṟa, oloka huya madema, na ṟauṟa ya mvuo, “nosa ko pfinya.”

⁷ Kawetirimisha iṟunda lya orio mndu kundu wandu wamanye iṟunda lyake.

⁸ Mando ha ngaṟenyi hekewuya na handu ha maowionyi hakawekaa kiidi kya mbako tsaho.

⁹ Otanu lo kiwiriwiri lukasama kuwuka handu halo, na mbeo ikawiwita mnu.

¹⁰ Kwi mṟufu fo Ruwa mṟinga fukawa iho mṟinga fukawa iho fuchelela.

¹¹ Ruwa kaichuṟa mapuchi ṟauṟa njiwanzi mapuchi hakaichuo mbaṟuko tsake.

¹² Kwi iwawaso lyake shindo shose shikatengeta ipfo na ipfo, iwuta chandu aishiwawasa shiṟunde kiidi kya wuyana ashiwikie.

¹³ Ruwa nekeinutsia shilya aṟeheṟie wuyanenyi, kiwe ni ihoṟuo wandu, ang'u iloṟa ikunda lyake.

¹⁴ “Kiwaṟi uadanyie iyo Yobu; tsia, uadanyie ngata tsa Ruwa

¹⁵ Ngesa na uichi chandu Ruwa ekewawasa isho ashiwikie ke mbaṟuko na mapuchi hake haile weṟu?

¹⁶ Ale na uchi chandu mapuchi haikumengeṟa ipfo nginehu? Iho nyi maṟunda ha ichu awode wusumhanyi na wuaria.

¹⁷ Iyo nokuwonyi ke noṟee nguwo tsa mrike nakamu, kiheri kya otanu lo nuka lochea oruka.

¹⁸ Ngesa, nochiidima iala ngina chao tsikauma cha kilola kya-aṟeṟa?

¹⁹ Luloshe chandu lochiwia Ruwa, kipfa makusaṟo hadu hai senyi-pfo lui meemenyi.

²⁰ Nyiu echikaria iwia Ruwa njikundi ideda? Nyiu echideda naendio ngapo?

²¹ “Kioweṟe sa kitutu mndu echiidima iwona na pata-sepfo; mnengeṟi fuowishe mapuchinyi otanu loseṟewenda ngina!

²² Sa njicha yewaa iwukie mtsudu Ruwa namṟingichie nyi kiṟumi kioweshie.

²³ Ruwa Menyi Pfinya alechiwa ikooyo nyi mndu, pfinya na wuele woke nyi wung'anyi naichuo wulohi na wucha ekedetsa kilya kya lohi ma indi pfo.

²⁴ Ko ikyo wandu wose wekemwowuo; o ekesaṟa mndu oose menyi orikiki-pfo.”