YOBU 36 - Bibilia Kui Mdedie fo Kimochi

¹ Kiidima Elihu kaengeṟa ideda kehamba;

² “Njiweda kitutu, na inyi njechikuloṟa kindo; kipfa na njiwode kehamba handu ha Ruwa.

³ Njechiende wulaanyi woko wuka kuleshe mnu, na iloṟa ke ichu monjiwumba nyi ai mwele.

⁴ Na lohi da! Madedo hako chi ha wongo-pfo menyi wuṟango ahendie kisomionyi nai iya na iyo.

⁵ “Adanyia, Ruw anyi awode pfinya ma ekemina mndu oose-pfo, wuidimi wo wuṟango, woke nyi wung'anyi mnu!.

⁶ Ekeda wawicho wake na moo-pfo indi kawewonyia walya wasoko kilya kyawo, wusumhanyi wowo.

⁷ Ekeda alaringa wandu wecha-pfo nekewashimbuo, wakaitoṟia na iwemba.

⁸ Kyaindi kokoya wandu waiwapfunge na mshe, waiwawade kiidi kya ndusu tsa mawawio;

⁹ Ruwa nekewaloṟa mawuto hawo mawicho, ke wo nyi wandu wa orikiki.

¹⁰ Neketambaṟuo madu hawo waicho kiloshio, kawewawasa wawuye na ida wuwicho.

¹¹ Waikaindia Ruwa na imṟundia, wekeiṟimiṟa kiidi kya mkonu yawo yose; maka yawo yose yawa ya sia.

¹² Indi walamiindie, wechiarisika kwi oshu, na opfu kipfa kya ituṟa wuṟango.

¹³ “Walakundi Ruwa wakundi isuo, wekefihiṟia ndarama ilyi-awafiṟita-pfo.

¹⁴ Wekepfa wai wakoho moo yawo yekesia cha ya weṟunda ngafu.

¹⁵ Ruwa kawekiṟa wafafa kwi wufafa wowo kahaluo wukiwa wowo wuwatambaṟuo meso.

¹⁶ Ruwa nalekukuruo kakuwuta wukiwenyi, kakuwika handu kuwode meeke kulawode wukiwa, kawika shinoru mezenyi kopfo.

¹⁷ “Indi wulalu moanduyo cha mowuta mawicho, mwaanduye fo lohi fokukooya.

¹⁸ Kuṟise tuke yake ilakutewe ipiṟe, ang'u masaa halya ha njoko hakakudetsa.

¹⁹ Ngesa kifihiṟo kyapfo kechiidima kuwuta wukiwenyi, ang'u pfinya tsapfo tsose tsechikutarama?

²⁰ Ulalange kio kiche, keketewa wandu wadekedeke handu wai.

²¹ Kurise! Kulahalukie wuwicho kipfa noleinengo mawawio hakakuringa na mawicho.

²² Kumbuo wunene wo pfinya ya Ruwa; nyiu echiidima imlosha kindo?

²³ Nyiu aleidima imsaya njia yake, ang'u eidima mbia, ‘Nodeko?’

²⁴ Ulahadime iṟumisha mawuto hake; iho wandu waihakapia oṟenje.

²⁵ Wandu wose walewona isho Ruwa awutie; mndu o wandu nekewona wuka kuleshe.

²⁶ Ruwa nang'anyi mnu manya loidima immanya-pfo; ma kiherikya ohendo lo moo foke fochiwa isonjoloka-pfo.

²⁷ Oo nekekuruo mṟinga fo ipalyipaly, kiidi kya mtiima kawika matacha ha mvuo.

²⁸ Nekewika mapuchi haende mvuo, ikanosa wandu kwi mweena.

²⁹ Nyi aichi chandu hekekuala, ang'u makuṟuṟuma ipfo nginehu?

³⁰ Oo nekeala uwaṟuko loke lukamṟingichia, kashikia njoṟoo tsa ipalyipalyi.

³¹ Wandu wekewona kando ilyi mvuo yakapa wakawona kando kafoi.

³² Nekewada mbaṟuko kwi mawoko hake, kiidima kaṟunga kelasa nawo.

³³ Ifunjika lya ikuṟuṟu ma lyahamba icha lya Ruwa, ma mando hawode moo haidikie naicha.”