YOBU 34 - Bibilia Kui Mdedie fo Kimochi

¹ Elihu kaengeṟa ideda na ihamba:

² "Adanyienyi madedo hako, nyo wenye wulaanyi, njidehienyi madu, nyo wenyi wuṟango.

³ Kipfa kudu kokehesha madedo chandu olimi lokesonja kando.

⁴ Lusambuṟe shilya sha sumhana Lumanye luwenyi shilya shii shicha.

⁵ Kipfa Yobu nahamba: 'Inyi njii na wusumhanyi, nao Ruwa kanjisoka wusumhanyi woko.

⁶ Ma ngawa menyi wusumhanyi njimtane mowongo; itiinga lyako lyichia-pfo ma chandu njilawode mti.'

⁷ Ngesa nyiu cha Yobu ekenyo wupiṟi cha mṟinga?

⁸ Ekechumia na wetahacha na ihenda na wandu wawicho.

⁹ Kipfa nadeda, kuwode kitarama kyose ikuchihiṟa na Ruwa-pfo.'

¹⁰ "Ko ikyo njiadanyienyi-nyo waṟango. Mulakusaṟe ke Ruwa nekewuta sha mkika: Ma Menyi Matorito iwuta wunyamaṟi.

¹¹ Kipfa nechitaa mndu o wandu na iṟunda lyake, nao nechihaluo orio mndu nawone njia yake.

¹² Na lohi-da Ruwa ekewuta wuwicho-pfo; ma echidetsa mwanduye-pfo.

¹³ Nyiu alembawasa iambuya wuyana? Nyiu alembikia wuyana-wu wose?

¹⁴ Kokooya Ruwa awekusaṟa kyake amonyi kechiwuta mṟufu fo moo wuyanenyi.

¹⁵ Shii na moo shose shiwearisika piu, na mndu o wandu nawechihaluka kiluli.

¹⁶ “Kokooya uwode wuṟango adanyia; uicho iki njikuwia.

¹⁷ Ngesa ichu aichilia wuyana kwi iwawaso nasuo wuhoṟotsu? Ale-wo nechikaria ianduya menyi wusumhanyi awode pfinya?

¹⁸ Ichu echiwia mangi, ‘Iyo nyi mbosha! Na wandu waapfinya, nyo nyi wandu wawicho.’

¹⁹ O ekekundia wanene isaṟa kya wasuṟi kota wakiwa-pfo kipfa wose nyi iṟunda lya mawoko hake.

²⁰ Kakema wose nyi wapfie nekededemisha kio na opfu-lukawechea waapfinya wose wakafolyio kuleshe kulawode pfinya tsa mndu.

²¹ “Meso ha Ruwa hekeṟisa ohendo lo wandu, kawewona ndifo tsawo tsose.

²² Wandu wawicho wechiidima iowa-pfo, kiwe meemenyi ang'u kio.

²³ Ruwa ekewia mndu ilyi mandi ameende na mengeni yake-pfo.

²⁴ Nekerumatsa menyi pfinya kulawode iwaṟisa, na iwikaho wengi handu hawo.

²⁵ Kipfa naichi mawuto hawo, nekewapiṟintsa kio wakasaramaya.

²⁶ Nekewalachuo patehu kipfa kya wuwicho wowo.

²⁷ Kipfa wadeye imwosha wakamina njia tsa Ruwa tsose.

²⁸ Wakatewa kieṟeṟo kya wakiwa kikashikia Ruwa, Ruwa kaicho kieṟeṟo kya iwo wailiso wukiwa.

²⁹ Kokoya Ruwa atsia, nyiu echiidima imbonyia-owingo? Kaṟika kyamu kyake nyi echimbona.

³⁰ Kiwe nyi isanga ang'u mndu umu-umu? Nekewika ado mndu mbicho nalaitoṟie ang'u walya walereeka moo yawo ko wandu.

³¹ “Luhambe mndu nawia Ruwa, ngadeko njechinyamaṟa se-pfo.

³² Njiloṟa mawicho njileidima ihawona koko ngawuta mawicho njechihawuuya-pfo.

³³ Ngesa Ruwa kimbaṟi na mhoṟuo chandu iyo uwonyi? Iyo nyio okedumbuo chi inyi-pfo Wulalu hamba chandu ukusaṟie.

³⁴ Mndu oose awode wuṟango na orio awode wulaanyi ainjiadanyia nechihamba.

³⁵ Yobu nadeda alawode wuṟango, madedo hake ha wulya.

³⁶ Nanga Yobu awechiṟiso-ṟiso itane ifurumia, kipfa nahaluo cha wandu wawicho.

³⁷ Kaengeṟa ideko huya njonyamaṟo tsake kadung'anyitsa makangao kiidi kyadu na iengeṟa madedo hake sumhana na Ruwa.”