YOBU 33 - Bibilia Kui Mdedie fo Kimochi

¹ "Kyaindi wulalu Yobu ngakuterewa uadanyie madedo hako, kuadanyie hose piu.

² Ambuya wulalu ngatambaṟuo dumbu lako, olimi loko luideda dumbunyi lyako.

³ Madedo hako haihamba wuhoṟotsu wo mrima foko, na iho njilaichi dumbu lyako lyechihadeda kwi wuhoṟotsu.

⁴ Mumuyo fo Ruwa fulenjiwumba na mṟufu fo menyi matorito fukanjinenga moo.

⁵ Kokooya oidima njihaluo saya madedo hapfo necha, oshangunyi loko uhoṟoke.

⁶ Ambuya inyi njii oshangunyi lo Ruwa chandu iyo ui, inyi njilewumbo kiidi kya teri.

⁷ Ambuya, iowesha lyako lyechiidima ikuendie wuowu-pfo, ma njiwode wulemeri-wolemio-pfo.

⁸ Na lohi odeda madunyi hako, ngaweicho ṟu lya madedo hapfo kochihamba,

⁹ Inyi nyi mwele, njilawode madeko; njiwode kindo kiwicho njiwutiepfo manya wuwicho wui kiidi kyako-pfo.

¹⁰ Ambuya, nowona kitewe lulekane nawone ke o nyi mkituwa oke.

¹¹ Nawikie madende hako kiidi kya matima, kaweambuya na ohendo lo madende hako.

¹² Ambuya, Yobu njikuhaluo, kiidi kya idedo-lyi uwode wusumhanyi-pfo kyamba Ruwa nyi ang'anyi kota mndu o wandu.

¹³ Nki ilyi ohodana na Ruwa kochihamba echihaluo idedo lyapfo ma lyimu pfo?

¹⁴ Kipfa Mndumii-Ruwa nechideda lyimu, ee da na lya kawi kyaindi mndu echimanya-pfo.

¹⁵ Kiidi kya ndodo, kiidi kya mawonesyo ha kio, mado malemeri hakachea wandu walee shitaṟenyi shawo,

¹⁶ nalyo eketambaṟuo madu ha wandu kawamanyishia kiloshiyo kyawo.

¹⁷ Kundu nawute mndu kiidi kya makusaṟo hake na iṟikio mndu orikiki loke.

¹⁸ O nekeringa mndu nalaoloke ṟungunyi na moo foke fularumatso nyi oshu.

¹⁹ Nekehoṟuo mndu kitaṟenyi echiwawio na irekiana lyilawode itsitsa-mafuonyi hake.

²⁰ Mrima foke fukasuo kando nyama njicha kaweisuo.

²¹ Kapooka nalawono nyama ya mbihu kawa mafuo kichikichi.

²² Kashikia o, manya natikiria ṟungu, na moo foke fohenda isia.

²³ Kyaindi kokoya kuwode malaika hamu nao motambahaluo umu kiidi kya kiki, kundu naloṟe mndu-cho isho shimbaṟi iwuta.

²⁴ Naalyo ekembonyia isaṟia, na ihamba, Mringe nalaoloke ṟungunyi. Inyi ngambonyia okiṟo.

²⁵ Nyama ya mbihu foke yechirendekelya cha ya mkoku, kawuya-mafiri halya ha uwanake woke.

²⁶ O neketerewa Ruwaoke kamiidikia, mṟasa nawone oshangu loke ko sia kawewihiṟia mndu wusuṟi woke.

²⁷ Kaimba oshangunyi lo wandu kahamba, Inyi njilewuta wunyamaṟi ngawedetsa shilya shiwewaṟi njiletao kiṟache kya shindo-shi-pfo.

²⁸ O nelekiṟa moo foko fulahende ṟungunyi na mrima foko fochiambuya sa.

²⁹ Isho shose nyi Ruwa akewuta kawi, ee ma kaṟaṟu ko mndu.

³⁰ Kundu nawihiṟe moo foke fuwuke ṟungunyi, kundu nawe sa ko sa ya wai na moo.

³¹ Ambuya mnu Yobu njiadanyia, Tsia sau, inyi njihamba.

³² Kokoya nowode idedo lyededa, njihaluo deda, kipfa njikundi ikuwia nuwode wusumhanyi.

³³ Shile wudo, njiadanyia, tsia na inyi njechikulosha wulaanyi.