YOBU 32 - Bibilia Kui Mdedie fo Kimochi

Madedo ha Elihu

¹ Kyasia wandu-wo waṟaṟu wakada ihalyuyana na Yobu, ko kipfa nawei o wusumhanyi mesonyi hake amonyi.

² Nahong'u Elihu kapfuluko nyi nyashi ai mana o Barakeli, Buzi o kishari kya Rama kipfa kya Yobu, alekuinenga wusumhanyi kota Ruwa-

³ Ngoseṟa kawado nyi nyashi kipfa kya mbuya tso tsiṟaṟu tsa Yobu kipfa kya ilemo imhaluo, ke kyaloṟa Ruwa nyi mdeko.

⁴ Elihu nawetsie sau kiheri kyo wameeku-wo wawededa na Yobu, kipfa o nawei manake kota wo.

⁵ Kyaindi kekiwona wandu-wo waṟaṟu walemo piu ihaluo Yobu, kapufuka nyashi.

⁶ Kyasia Elihu mana o Barakeli o kishari kya Buzi kawooka ideda:- “Inyi nyi manake, nyo nyi wameeku ngoseṟa- ko ikyo-njileowuo imuwia makusaṟo hako.

⁷ Njilehambia mrimenyi, leka wandu, waku wadede, wenyi maka ifoi waloshe wulaanyi

⁸ Indi mumuyo fui kiidi kya mndu mṟufu fo Ruwa menyi pfinya, foketarama mndu imanya.

⁹ Chi mṟasa nokuo kyo kiinenge iwada wulaanyi-pfo ma wameeku chiwo tupu waichi kisumuhanyi-pfo.

¹⁰ Ko ikyo ngahamba, ‘Njiadanyienyi; lekenyi njihambe chandu njikusaṟie.’

¹¹ Kyaindi, inyi njilemuwedia njiwone-ikyo muwekundi ihamba, njilewaadanyia madedo hanu ha wuṟango, chandu muwei itambahana ishiha kindo kededa.

¹² Ngamadanyia kwi wulaanyi, kyaindi kuwode aleidima iwinga Yobu-pfo, mose mulelemo ihaluo madedo hake.

¹³ Kuṟisenyi mulawone mochihamba, ‘Wulalu luwode wuṟango, Ruwa nyio echimbiya chi mndu o wandu-pfo.’

¹⁴ Madedo ha Yobu hawei kipfa kyako inyi-pfo, ko ikyo njechimhaluo chandu nyo mulemhaluo-pfo.

¹⁵ “Waṟihiyo, wahaluo -se-pfo, ma wawode idedo lyededa-pfo.

¹⁶ Wulalu na inyi ngesa, njiwede kipfa kyawo ilyi walaideda kipfa wahoṟoka waketsia do ma walahaluo-se.

¹⁷ Inyi njechihaluo kikamba kyako Inyi nawo njechiloṟa chandu njiwonyi.

¹⁸ Kipfa njiwode mfoeṟa fo madedo mumuyo fui kiidi kyako funjiitika.

¹⁹ Ambuya-ndeu yako ii-cha mvinyo fupfumbe. Cha selela njiha ii kufui na ipaṟika.

²⁰ Njideda kundu njiidime itsia, njitambaṟuo dumbu lyako na ihaluo.

²¹ Hoi, njilakundie kyaamu kya mndu; ma njilakukundishie ko mndu oose.

²² Kipfa njiichi ikukundisha-pfo, kofia, ichu alenjiwumba nawechinjionduo ko oweṟe.”