YOBU 31 - Bibilia Kui Mdedie fo Kimochi

¹ Njilelya mma na mesao hako wulalu njechiidima njida iambuya mana o waka.

² Kipfa kilya kya Ruwa kiwukie huye kiwechiiwa-ki? Na kyooṟa kya Mndumii-Ruwa kiwukie huye?

³ Chi ofuku ko wenyi ngafu na wukiwa ko wewuta mawicho?

⁴ Aka-le, o awonyi ohendo loko, na-iitala ndifo tsako tsose?

⁵ Ke njikeri ichumia kiidi kya wuwicho na odende loko ludichia wulembi.

⁶ (Njilekenyi na kihesha kimsumhanyi, kundu Ruwa nawone wuhoṟotsu woko).

⁷ Ke ndifo tsako tsahenda kihadi tsikada njia, na mrima foko fukalembo nyi meso hako ngoseṟa kipaṟi kyose kiwadanyi na mawoko hako.

⁸ Kyasia njiwaaye na ungi nalye. Ee, shilimu sha dema lyako shikuṟuyo.

⁹ Kokoya mrima foko fulelembo nyi mndu mka na inyi ngalaaya mongonyi ko wamṟasa oko.

¹⁰ Nlyo ng'u mka oko awechiwada iseo ko ungi na wengi wahoyane huyake.

¹¹ Kipfa ikyo kiwechiwa ideko lying'anyi ee, wuwicho wochihoṟuo nyi wachili;

¹² Kipfa nyi modo forumtsa itane orumaṟo nafo fuwechikuṟuo shilya shako shose.

¹³ Kokoya ngamina mwanduye fo mṟundi oko, ang'u kisinga kyako, kiheri wawekuhoda na inyi.

¹⁴ Kiheri Ruwa echinjiambuya nkiki njechiwuta? Kanjichea, njechimhaluo ki?

¹⁵ Ngesa ichu alenjiwika wusunyi, chio alembika nao? Chi ichu umu alekuumba wusunyi?

¹⁶ Kokoya njileima wakiwa shilya wakundi Ang'u ngawika-iwushiwushi mesonyi ha mka mkusu.

¹⁷ Ang'u ngalya kando kako njimonyi, wangoeda walawone kindo walya.

¹⁸ (Ote, Wokia-uanake woko nawei hamu na inyi cha ko wande. Na inyi mbei msongoru o mkusu wooka wusunyi wo wama oko).

¹⁹ Kokoya njilewona mndu asaṟamaya awuṟa maṟao ang'u wahuṟi wawuṟa nguwo.

²⁰ Ma kokoya alanjiwikia ona ma alaicho mrike kipfa kya nguwo tsa mafufuta ha machondi hako.

²¹ Ngaweiria mawoko hako kipfa kya ngoeda njiwona kitarama kyako mongonyi.

²² Kyasia koso lyako lyioloke lyiwuke handu lyii na owoko loko lufunjike fuo.

²³ Kipfa kilio kiwukie ko Ruwa kiwei keṟihisha koko, kipfa kya wunene woko njileidima iwuta kindo-pfo.

²⁴ Kokoya ngahaluo sahabu iwe kikusirio kyako na iwia sahabu njicha, Iyo nyi ngaya yako;

²⁵ Kokoya njilechihiyo kipfa-kya masaa hako hawefoi, na kipfa owoko loko lulewona shindo shifoi.

²⁶ Kingise kokoya njileambuya mengeṟi kiheri fulewaa, ang'u meeri kiheri fuwei iwaa.

²⁷ Na mrima foko fukatandawusho ku kiṟika na momu yako ikakomba mawoko hako.

²⁸ Ikyo kiwechiwa kiwicho na wuwicho wohoṟuo nyi wachili kipfa njiwechiwia Ruwa chu o huye wongo.

²⁹ Kokoya njilechihiyo kipfa kya osaramayo lo ichu alenjisuo, ang'u ikudosa ili alekoyana na mawicho.

³⁰ (Ee, njilelekia dumbu lyako iwuta wunyamaṟi pfo ko ikunda moo foke ko ilya nyamu).

³¹ Kokoya wandu wa kanyi koko walalededa, Nyiu echiidima iwona mndu aleihutso nyama nyio?

³² Mhenu alelaa njienyi-pfo indi njileṟuhuo mongo yako ko mokyaṟo, Njikeri cha mndu o wandu ngashikia madeko hako na iṟika wuwicho woko kipeetehu kyako.

³³ Kipfa kya iowuo chila ing'anyi Na wuminyi wo oshari loko wulenjineenga uwowu, ngatsia sau njilawuke mongonyi.

³⁴ Kipfa-kya iowuo chila ing'anyi na wuminyi wo oshari loko wulenjineenga wuowu, ngatsia sau njilawuke mongonyi.

³⁵ A kima njiwewode mndu monjiadanyia! (Ambuya, mṟeho foko nyi ifu: Mndumii nanjihaluo) A kima mbewode mṟeho fo isho wakituwa wako walenjikumba nasho.

³⁶ Nyi lohi njiweduo makosohu hako Njiwehaoṟowia cha kitambaa kya mdohu.

³⁷ Njiwechimbia itala lya ndifo tsako, Njiwechihenda kufui cha mana o mangi

³⁸ Kokoya oruka loko luifihiṟa kimu na shyahu naawo,

³⁹ kokoya njilie ndunda tsalo kulawode itaa Ang'u kokoya ndewatewa wakadetsa moo wawenyi;

⁴⁰ msha ido handu ha Ngano na mambuṟo handu ha Ngano ncha Madedo ha Yobu nyi iya hatsitsa.