YOBU 30 - Bibilia Kui Mdedie fo Kimochi

¹ Kyaindi iwo watutu koko wainjitaluo, wandeawo njilewawia ngawasanza na po lya shite shako.

² Nyi kiki njechiiria ho ipfo pfinyenyi tsa mawoko hawo? Wandu pfinya tsawo tsitsitsie.

³ Wapookie kipfa kya njaa, wasuma teri njiumu, meema fo wukiwa na inyamaṟika.

⁴ Wekeṟuo mboha tsa monyo kiidi kya masahawa, wakalya mṟi ya maṟa heseṟewenda.

⁵ Wekewingio wawuke kiidi kya wandu, wakakapio kitohio cha kya miiwi.

⁶ Wekekaa kiidi kya mapuchi, na kiidi kya mbako tsa ngaṟahamba.

⁷ Wekefihiṟa cha nzoi ii masahawenyi, wakakuwumbia mbaawenyi.

⁸ Wo nyi wana wa matondo, ee wana wa ngafu, walewingio wetandiko malio wawuke kiidi kya oruka.

⁹ Na wulalu ngawa kiimbo kyawo, ngawa kindo kilaiho kowo.

¹⁰ Wanjisuo wakalekana na inyi, wekenjipuchia mada kyaamunyi kyako.

¹¹ Kipfa naleheṟuo kiwoho kyake na injilisa wukiwa, ma wakeri ikuṟiisa-se oshangunyi loko-pfo.

¹² Owoko loko lo-kulyo kituṟu kya wandu kekekure wakatsindikia madende hako mbai, wakanjidosia njia tsako kilimu kya inyamaṟika.

¹³ Wanyamaṟe njia yako, waengeṟa wukiwa woko, wandu walawode mtarami.

¹⁴ Wanjichea cha wandu waida handu mba ipaṟikie makidi hawi, ha mba iwundukie wanjisaṟikia.

¹⁵ Shindo shioweshie shanjihalukia, wawingia kiṟumi kyako cha otanu na iiṟimiṟa lyako lyaida cha ipuchi.

¹⁶ Wulalu moo foko fosia kiidi kyako mfiri ya matuuro yanjiwada.

¹⁷ Kiheri kya kio mafuo hako hekelya kiidi kyako na mawawio hakaimada halasie moo.

¹⁸ Kwi ndaaṟe yako ii na pfinya ing'anyi maṟao hako hanyamaṟika hanjifiṟita cha nzingo ya kanzi ii yako.

¹⁹ Na injipiṟimtsia odokonyi na inyi ngawa cha kiluli na ifu.

²⁰ Ngakufihiṟia iyo, na ulanjiidikie ngahoṟoka na iyo konjiambuya tupu.

²¹ Iyo nohaluka kowa mbawo koko nokenjisuiṟa kwi pfinya ya owoko lopfo.

²² Nokenjiiria huye mṟasa otanunyi, konjidosia huyalo konjisalaṟa kiidi kya masinamu.

²³ Kipfa njiichi nochinjiende mṟasa opfunyi njishikie mbenyi ya wateṟie wose wenyi moo.

²⁴ Ale mndu kaho ekelesha owoko? Na ifihiṟa nataramo ipfo mawawionyi hake?

²⁵ Ale, inyi njilefihiṟa kipfa kya icho awei kiidi kya wukiwa? Moo foko ngesa, fulesokio nyi fowa kipfa kya walya wahuṟi?

²⁶ Alya mbekusirie mecha, mawicho hakanjichea, na kiheri mbewedia sa meema fukanjichea.

²⁷ Maula hako hadedema ma hada-pfo mkonu ya kiwi yanjichea.

²⁸ Njihenda njekapa kilio kulawode mnengeṟi Ngahoṟoka kiidi kya chila na iifuhia ndarama.

²⁹ Inyi wana wa wama wako nyi shisii nyi wana wa wama wa-nyaha.

³⁰ Njonyiyako ya mbihu nyi injiiwu, nayo yaowoka, mafuo hako hasenekia kipfa kya mrike.

³¹ Kwi kipfa kio, kinanda kyako kyahaluka kilio na mtoṟiṟo foko fukawa ṟu lya waifihiṟa.