YOBU 3 - Bibilia Kui Mdedie fo Kimochi

Yobu asesa mkonu foke fofeo

¹ Nduma ya isho Yobu-kawoka ideda kasesa mkonu fulya foke fofeo.

² Yobu kahamba;

³ “Mfiri fulya-njilefeo fuseso; kio kilya kilehambo, ‘Komemoho mana o womi.’

⁴ Mkonu fo fuwe meema! Mndumii-Ruwa nalafuambuye awuka huye, Kulawaṟe sa huyafo.

⁵ Meema fukae huyafo, Ipuchi lyishinge huyafo-da, Mfiri fuwe kio rambatanyi.

⁶ Kio kyo meema fushinge! Manya fulaitalio mkonu ya maka, ma fulawe fumuho fo meri.

⁷ Ee da! Kio kyo kikumbe, ṟu lya sia lilaichio.

⁸ Walya wesesa wo wasese mfiri fo, na iwo waluwihiṟie ipuhutsa Lemiathani (molimo) wafusese.

⁹ Nyenyeri tsa kilawo tsirume, fulange iwona sa, kyaindi fulawone, ma fulawone sa ya ngamenyi kilawo.

¹⁰ Kipfa kio kyo kilepfunga wusu, wo wama pfo, manya iṟika wukiwa njilawuwone.

¹¹ Kitewe njilapfe lilya njilefeo nyiki, njiwuke wusunyi na ideka?

¹² Kitewe wama nanjifee nyiki? Kitewe ngaonga nyiki?

¹³ Kiwechichia njiṟiko njilaichi, njiwelaṟo na isia moo,

¹⁴ Kimu na wamangi na waitoṟi wa wuyana, walelauo mba tsiwundukie;

¹⁵ Njiwechikaa hamu na wanene wawewode sahabu, waleichuṟa mba tsawo fesa pacha.

¹⁶ Ang'u nkitewe njilalewa cha apfiie alandeshika, ifeo nganyamaṟikia wusunyi, cha wanangu walalewona sa ing'anyi.

¹⁷ Ko waṟumu kuwode molisa wukiwapfo, walya waleheli wekesia moo.

¹⁸ Wapfungo wekewona sia wai kimu, wekeicho ṟu lya mowahoṟokiapfo.

¹⁹ Wanene wa watutu wakeripfo, masinga hawona mkuachie, haleshe na wenyi-wo.

²⁰ Kikawa kida isaṟia se ichu ai wukiwenyi, na moo ichu ai na fowa mṟimenyi?

²¹ Mndu alangie opfu kyaindi nalapfe; nakeshiha opfu kota kisa kikiṟike.

²² Mndu cha icho nechichihiyo na ikesa, nechichihiyo ilyi echipfa na iṟiko.

²³ Kitewe usaṟie mndu ohendo loke lo moo, na njia tsake tsitsishinge, na Ruwa nambikie kishingo?

²⁴ Kipfa wukiwa woko wowa mkate foko. Ngakarishia naiitsika lyikaletseka cha mṟinga.

²⁵ Kilya njikiowoye nkyo kyanjihoya, na kilya kenjiwuta madima nkyo kyanjiwada.

²⁶ Njiwode ofoṟo ma olelepfo; ngasia moopfo, wukiwa wonjichea.”