YOBU 29 - Bibilia Kui Mdedie fo Kimochi

¹ Yobu kaweengeṟa se ideda kahamba,

² A kima njiwei cha meeri yako ya kacha, cha mkonu iya Ruwa alenjiringa;

³ kiheri taa yake iwenjilimikia huya mdo foke, na inyi ngachumia meemenyi kwi itaramo inyi sa yake.

⁴ Kiheri kya mkonu iya yako yewanga, kiheri kiṟike kya Ruwa kiwei kiidi kya ihema lyako.

⁵ Kiheri menyi matorito awei hamu na inyi, mandi wana wako wakanjiṟingichia.

⁶ Kiheri ndifo tsako tsiwesanjo na mafuda ha msika, iṟaṟa lyikanjiletsia meda fo mafuda!

⁷ Ngakure njechihenda mṟinyi, mṟasa kichuminyi, ngawika loṟika loko handu hanjiwaṟi chilenyi,

⁸ Wanake wakanjiwona wakaowa, wandu washitsie wakakure wakahoṟoka.

⁹ Wanene wakatsia waladede, wakawika mawoko hawo momuhu yawo.

¹⁰ Maṟu ha wandu wa kiṟumi haletsia, na njolimu tsawo tsilaidime ideda.

¹¹ Orio-kundu kulenjiicho kulenjiwikia ona, na orio riso lyikanjiṟingishia.

¹² Kipfa njilekiṟa mkiwa awei ilyia na mngoeda alawode mndu ngamsaṟia.

¹³ Ona lo ichu awei kufui na ideka lulenjichea ngahaluo mrima fo mkusu iimba na sia.

¹⁴ Njilekuṟika wusumhanyi wukanjishikia, na wuhendelyi woko cha ikonya na kitambaa kya mdonyi.

¹⁵ Njiwei meso ko kipfupfuṟe, njiwei madende ko mhulyi.

¹⁶ Njiwei ndee o wandu ko ahuṟi ngawekusaṟa wukiwa wo mndu ndamuichi.

¹⁷ Ngafunja mahundu ha wa mkika, ngamsoka kilya alasie mahehonyi hake.

¹⁸ Naalyo ngahamba, njechipfiia sungunyi yako, na inyi njiengeṟe mkonu yako cha msanga.

¹⁹ Itsinde lyako lyisotsie mri itane mṟingenyi, na ṟauṟa ikakaa maṟambehu kio taṟaṟa.

²⁰ Kiṟumi kyako kechiwa kihya na uda woko wochiwa wuhya mawokonyi hako.

²¹ Wandu waledeha madu hawo wechiadanyia na iweda, wakatsia do waidime iicho oloho loko.

²² Walededa-se-pfo wewekeicho madedo hako, orio idedo lyako lyikahoya huyawo.

²³ Wawenjiwedie cha wai iweda mvuo, wakasamiṟa madumbu hawo cha mvuo ya kisie.

²⁴ Njileseka nawo kiheri wawehusie macha, na sa ya kyamu kyako walekirumisha pfo.

²⁵ Njilewasambuṟia njia, ngadamia cha mnene owo, njilewa mangi kiidi kya itorito lya waaskari, cha alembalemba wekapa kilio.