YOBU 28 - Bibilia Kui Mdedie fo Kimochi

Shiṟumi sha wulaanyi

¹ “Na lohi kuwode marina hekesumo fesa, na handu wandu wekesanyiaho sahabu.

² Menya yekeṟuyo kiidi kya teri, na aṟeṟa ikasalaṟio ihohu.

³ Mndu neketirimisha meema, kashiha-shiha ma mṟasa fui kuleshe, maho ha meema fung'anyi meema rambatanyi.

⁴ Mndu nekesuma rina kuleshe na handu wandu wekaa; koshiha handu kuwode ndifo kukahadimo; kakumasa kuleshe na wandu-nekeṟunda ipfo na ipfo.

⁵ Kando kekewuka terinyi; kahaluo haluo teri cha modo.

⁶ Ipfo mahohu ha wanda kokekooyo-pfo maho ha wuhuru wung'anyi naho hawode msanga fo sahabu.

⁷ Kuwode ndehe njilang'a iichi njia-yopfo, ma riso lya mbeṟo lilemeiwone-pfo.

⁸ Mando malang'a hekekushela halemeichume-pfo, ma mwiso fulang'a fulemeide-ho-pfo.

⁹ Iho lyiumu lya iṟaṟa mndu kahesha ilipaṟa; kakapfuluo-mafumvu mṟasa odendenyi loho.

¹⁰ Kaweha mfongo kiidi kya maṟaṟa, na riso lyake lyekewona orio kindo kya wuhuru.

¹¹ Kaweima shimeda shilalehio mṟinga, na kindo ki-kiṟike kakishikuo.

¹² Indi wulaanyi wochiwono-ku? Na handu hemanya ni hanga?

¹³ Mndu aichi wuhuru woke-pfo, ma yekewono kiidi kya oruka lo wai na moo pfo.

¹⁴ Kiidi kya nduwa iṟungukie kohamba ‘Ai-kiidi kyaho-pfo, na ipalyipalyi lyikahamba, Ai kokopfo.’

¹⁵ Wulaanyi-wo wowono kwi sahabu-pfo, ma fesa yechihesho iwone wuhuru woyo-pfo.

¹⁶ Yechiwa ihesha kwi wuhuru wo sahabu ma ya Ofiri-pfo, ma kwi shindo sha wuhuru sha Sordomiki ang'u sha yakuti ya samani-pfo (maho ha wuhuru wung'anyi mnu nakamu).

¹⁷ Sahabu na shilola shechiwa iṟinganyisho nawo-pfo; ma koweilacha na shihia sha sahabu njicha kechiwapfo.

¹⁸ Wulaanyi wuidie orio kindo Ee, wuidie lulu.

¹⁹ Yakuti ya opuko ya Misri yechiwa iṟinganyisho pfo, ma yechiwa ikumbo ang'u ihuṟa ma sahabu-pfo.

²⁰ Kyasia wulaanyi nyi-ku wuwukie? Na handu ha imanya nyi hanga?

²¹ Kipfa injiṟike kuleshe mnu na meso ha wai na moo na iṟiko kuleshe na ndehe tsa nginehu.

²² Inyamaṟika na opfu shahamba; ‘Luleicho mbonyi tsapfo na madu hadu.’

²³ “Ruwa nyi aichi njia tsake, nao naichi handu hake!

²⁴ Kipfa nekeambuya mṟasa mtsitsionyi fo oruka, kawewona wanda ya ngina yose.

²⁵ Naidime iinenga otanu wulemeri woyo Ee, nekehesha mṟinga kwi kiheo.

²⁶ Kawikia mvuo iwawaso, kawikia owaṟuko lo ikuṟuṟuma njia.

²⁷ Nyiho handu alewona kahamba; karingishia, ee, na iweṟuwetsa.

²⁸ Kiidima kawia mndu o wandu, Ambuya iindia Mndumii nyiwo wulaanyi, na ikuṟisa na wuwicho nyikyo imanya.”