YOBU 27 - Bibilia Kui Mdedie fo Kimochi

¹ Kiidima Yobu kaengeṟa ihamba mfanano yake kahamba,

² “So Ruwa ai na moo, ichu alenjisoka wusumhanyi woko, menyi matorito alenjilisa wukiwa mrima foko.

³ (Kipfa moo foko fui mcha kiidi kyako, na mumuyo fo Ruwa fui kiidi kya mbuo tsako;).

⁴ Na kya lohi momu yako yechideda shilai sumuhana-pfo, manya olimi loko lochideda wulembi-pfo.

⁵ O manya-le, njilamutalie nyo iwa na wasumhanyi, mṟasa njipfe njechilekana na wuhoṟotsu woko pfo.

⁶ Wulalu wuhorotu-wo njiwuwode mnu, manya njechiwulekiapfo, mrima foko fochinjikapa mang'ang'o njii na moo pfo.

⁷ Mkituwa oko nawe cha icho mbicho, na icho monjiambuya kinyeeri nawe cha alawode wusumhanyi.

⁸ Akale, kikusirio kya mdetsi nyi kiki, ma chandu aiṟimiṟa Kiheri kyo Ruwa ambuta moo foke?

⁹ Ngesa, Ruwa nechiicho kifihiṟo kyake. Ili mandi waale womshikia?

¹⁰ Ngesa nechikuchihiṟa ko menyi matorito, na iambuya Ruwa kiheri kyose?

¹¹ Njemulosha nyo mbonyi tsa owoko lo Ruwa; Isho shii ko menyi matorito njechishiṟika pfo.

¹² Ambuya, nyo mose momewona muwenyi, nki kitewe muiwuta shilawaṟi piu?

¹³ Ifu nyifo mwoko fo mndu mbicho ko Ruwa, na kyooṟa kya iwo wewonyia, waambilia ko menyi matorito.

¹⁴ Wana wake wakapfumbuka nyi ko oshu, kishari kyake kechiihuda kando-pfo.

¹⁵ Iwo wechitsuhaa-koke wechiṟiko ilyi wechipfa, waka wakusu walepfiio nyi wamii wechikapa kilio-pfo.

¹⁶ Ma kasanya masaa cha kiluli, kawewada maṟao cha teri hafo;

¹⁷ kunda kohasungusia, indi wenyi-wusumhanyi wechihaṟaa, na walawode wukika wechihawana masaa-ho.

¹⁸ O nekewika mba yake cha ikuṟu, cha kitengo kiwiko nyi mringi.

¹⁹ O nekelaa -laa ai msuṟi, indi nyi fo mtsitsionyi foke, tambaṟuo meso hake, nao aipfo-pfo.

²⁰ Shindo sheowesha shikamkooya cha mṟinga fufoi, masinanu na kiwiriwiri kikamiiwa kio.

²¹ Otanu lo ora lo ngamenyi lokemduo, na kahenda lukamṟukuta nawuke handu akeri.

²² Kipfa Ruwa nechimkumba alemsaṟia; Nawechikunda idicha owoko loke.

²³ Wandu wechimkapia mawoko, na imkapya mang'ang'o nawuke handu hake.”