YOBU 26 - Bibilia Kui Mdedie fo Kimochi

Yobu ahaluo Bildadi

¹ Kyasia Yobu kahaluo kahamba,

² “Chandu uletarama icho alawode wuidimi! chandu ulekiṟa owoko lulawode pfinya!

³ Chandu uletarama ichu awuṟie wulaanyi, na ionguo wuaria wo oloho wufoi.

⁴ Ngesa, nyi odeda madedo ha ko u? Nyi mumuyo fuda fuwuka kopfo?”

Pfinya tsing'anyi tsa Ruwa

⁵ “Iwo walepfa wadedema, wanda ya mṟinga fo iwo wekekaapfo.

⁶ Ṟungu lyi pang'a oshangunyi loko, inyamaṟika lyiwode soṟo-pfo.

⁷ O nekeala mtsudu handu kuwode mwaanya fulawode kindo, na imasa wuyana kulawode kindo.

⁸ Nekeshinga mṟinga kiidi kya mapuchi hake malemeri, na ipuchi lyo lyiranduka wanda yalyo-pfo.

⁹ Nekeshikia kyamu kya meeri na iala ipuchi huyapfo.

¹⁰ Katarucha cha kidenga ki nyi mṟasa fo mṟinga huya oruka.

¹¹ Ngo tsa ruwehu tsadedema, na iṟihio kwi idedio lyake.

¹² Nekefoha ipalyipalyi kui wuidimi woke, na ipucha Rahabu ko wuṟango woke.

¹³ Ngina tsinjishele kwi mumuyo foke; Owoko-loke lukatocha njoka iya yekedicha.

¹⁴ Ambuya, ishi nyi shaahu tupu sha njia tsake; na chandu shi shitutu shiwewedo lokeicho kiidi kya mbonyi tsake.” Indi nyiu echiidikia imanya pfinya tsa makuṟuṟuma hake?