YOBU 24 - Bibilia Kui Mdedie fo Kimochi

¹ “Kitewe shiheri shilawiko nyi Mdumii? Na iwo wamiichi walawonyi mkonu yake?

² Kuwode wekewuta shiacho sha mṟasa; wakaweduo mapo na ihalisa kwi orikiki.

³ Wakafuna nzoi ya alawode ndee, wakaduo mbe ya-mka mkusu wuaṟenyi.

⁴ Wakatewa ulya ahuṟi-ohendo loke; wakiwa na oruka wakaowa kimu.

⁵ Ambuya, cha nzoi nuka ya msanga Tsekekure, ihenda ishiha kando tsechipfuṟukana; Nuka ya msanga ikatsiinenga kando ka wana wawo.

⁶ Wakasambuo kando ka mso mademenyi, na itola ndunda tsa sabibu tsa wukika.

⁷ Wakalaa kio taṟaṟaa kitaṟe tare nguwo, wawode kekushikia mbeo-pfo.

⁸ Wekechoowia ṟawuṟa ya mafumvuhu, wakawekoyana na ngaṟahamba tsa maho kulawode maowionyi.

⁹ Kuwode wekewuto maweenyi ko pfinya ichu alawode ndee, na isoka mkiwa kilya awode kaaṟa.

¹⁰ Ma wakaṟahaṟaha kitaṟe kulawode maṟao, wo wakawado nyi njaa wekeduo mhanda ya kando;

¹¹ wakekama mafuda mbenyi ya wandu wawo, wakakama mvinyo indi wakaangaa.

¹² Wandu wakaluo kiidi kya oruka lwenyi wandu, na mrima fo ichu amfaṟe fukeri ifihiṟa; ma kudo Ruwa ekeambuya watondopfo.

¹³ Iwa nyi kiidi kya iwo walemina sa; waichi njia tsake pfo, ma wekekaa kiidi kya ohendo loke-pfo.

¹⁴ Mbaahi nekekure ngamenyi, kilawo, kawaaha wakiwa na wahuṟi; kiheri kya kio kawa cha miiwi.

¹⁵ Kake, riso lya mṟuhui lyekeweda meema, kechihamba, “Kuwode riso lyinjiwonyipfo,” kaowisha kyamu kyake.

¹⁶ Wo wekesuma mba meemenyi; wakakushingia mba mfiri waichi se-pfo.

¹⁷ Kipfa ngamenyi kowo nyi cha meema, kipfa-wo waichi shiṟihisho sha meema-pfo.

¹⁸ Mohamba, O namwaangu huya mfu; kyeenga kyawo kikisese orukenyi; Ekehaluka kahenda njienyi ya msabibu-pfo.

¹⁹ Ngaṟa na mbaṟi, shekesalaṟa mṟinga, fui iho; na wudo na ko waṟumu iwo wawutie wunyamaṟi.

²⁰ Wusu wulemfee wochimhadima; ishinu lyechimlya nawono naloda; echikumbuyo-sepfo, na wuwicho wochifunjo cha mdi.

²¹ Ee da! O nekelya wai wahumba walakefee; ma ekewutia mndu mkusu mecha-pfo.

²² Indi Ruwa nekeleletsa wenyi wuidimi na pfinya tsake, Walawode kikusirio kekaa na moo wakakure.

²³ Kawainenga olele wakasia nalo moo; na meso hake hakakaa huya njia tsawo.

²⁴ Wo wawaṟumishe; indi kioweṟe kitutu wakasheṟuka, ee da, wekesotso na iwuto njienyi cha wengi wose wakatsiko cha mahaa-ha Ngano.

²⁵ Kokoya shila kudo, naacho echinjianduya ke njii mwongo, na ihaluo madedo hako ha wulya?