YOBU 23 - Bibilia Kui Mdedie fo Kimochi

Yobu ahaluo

¹ Yobu kahaluo

² “Inu kieṟeṟo kyako nyi kiwawo. Njiwawio na ilehela.

³ Kima mbeidima imanya handu Ruwa ai! Ma ngashika hafui na loṟika loke.

⁴ Njiwechimdea mondu foko oshangunyi loke, na iichuṟa dumbu lyako madedo.

⁵ Njiwechimanya madedo echinjihaluo, njiwemanya iho echinjiwia.

⁶ Ngesa, nawechilimbana na inyi kwi, wunene na wuidimi woke? Ote! Indi nawechinjiadanyia.

⁷ O wasumhanyi wawechideda kimu nao, nahong'u njiwelekio na ulya moanduo mlungana.

⁸ “Ambuya ngahenda kusonguo aipfo nyi, ngawuya-numa, njilaidime imbona;

⁹ Owoko lo kumoso, kiheri aiṟunda indi ndaidime imbona nekeowa ora lo-kulyo, na njilambone.

¹⁰ Kyaindi naichi njia njikeri ihenda nayo; kamemaa injihesha, njechiwuka pfo cha sahapu.

¹¹ Odende loko luwadanyi na ndifo tsake, njiwode njia tsake tapu ma njilarendeuke.

¹² Njilewuya numa ngada wuwawaso wo dumbu lyake pfo, njileringa madedo ha dumbu lyake kota kando kako.

¹³ Indi o nyi umu, naacho echiidima imhaluo? Kake kilya akundi nkyo echikiwuta!

¹⁴ Kipfa o nechiinutsia kilya kiteseheṟe; kake, mbonyi tsifoi cha itso tsii kimu nao.

¹⁵ Ko ikyo njiwonyi wukiwa oshangunyi loke; ngakusaṟa njimuowuo.

¹⁶ Kipfa Ruwa natewa mrima foko fukawuṟa pfinya. Ruwa mopfinya nanjiichuṟa wuowu.

¹⁷ Kipfa njileowesho nyi mema pfo, na mema rambatanyi fohoya kyamu kyako.