YOBU 22 - Bibilia Kui Mdedie fo Kimochi

Madedo ha Elifasi

¹ Naalyo Elifasi Mtemani, kahaluo kahamba:

² Ngesa, mndu o wandu nechiidima itarama Ruwa? Na lohi da, ulya ai mṟango nekekutarama amonyi.

³ Ngesa, Mndumii-Ruwa nekewado n'sia kipfa kyapfo iwa menyi wusumhanyi? Ang'u nyi kiira koke iyo itambahana iwada wusumhanyi.

⁴ Ngesa, nyi iyo umwindia kakudedia? Na ianduo na iyo?

⁵ Ale ngesa, wuwicho wopfo chi sa wung'anyi? Na wuwicho - wo wulawode mtsistisonyi!

⁶ Iyo nolesoka manamoyo kilya kimbaṟi, kowuta nguwo tsa walya wai kitaṟe.

⁷ Uleinenga mṟinga ulya alehelipfo, ulya awewodo nyi-njaa kowemiima kando.

⁸ Kyaindi mndu ulya awode pfinya kawada oruka, na awode kiṟumi kakaa - pfo.

⁹ Kofuna waka wakusu wahende na mawoko ha- ru, na mawoko ha wangoeda hamafunje.

¹⁰ Ko ikyo-numṟingichie nyi mdeho, na wuowu wo kitusu wukulisa wukiwa.

¹¹ A ngesa, uwonyimeema; na mṟinga fufoi fukushikia?

¹² A ngesa, Ruwa ai huye ruwehu? Kake ambuya chandu nyenyeri tsi haleshe chandu tsi huye.

¹³ Na iyo kohamba, Ruwa nkiki aichi? Ngesa neidima iwuta kindo kyose memenyi fung'anyi?

¹⁴ Mapuchi nyi hamṟingichie aleidima iwona, nao nachumia mualoalonyi fo wuyana.

¹⁵ Ngesa, nochiosha njia iya ya kacha, walehenda nayo wandu wawicho?

¹⁶ Walerakuyo kiheri kyawo kilawemande, Otende lowo luweiluduo na mṟinga.

¹⁷ Walewia Ruwa, luleke! na nkyoiki mndumii Ruwa echiidima iluwutia-so?

¹⁸ Nao nyio aleichuṟa mba tsawo shindo shicha, indi chila ya wawicho ikae haleshe na inyi.

¹⁹ Wenyi wusumhanyi wekewona isho wakachihio, na walawode tewe wakawaseka.

²⁰ Wakahamba, na lohi walya wakuiria kyadu waarisio kuleshe, na walya watsuhaa, modo fukawarumatsa.

²¹ “Manya mnu Ruwa, kundu uwade ofoṟo, Na lyondi mecha hechikuchea.

²² Ngakuterewa uambie kiloshio kya dumbu lyake, na madedo hake uhawike mrimenyi fopfo.

²³ Kowuuya Ruwa nochiwanga, kowuta wukika wukakaa haleshe na mba yapfo,

²⁴ kokoya-owika sahapu yapfo kilulinyi, na sahapu ya Ofiri kiidi kya kimeda kya maho,

²⁵ na-kokoya Mndumii-Ruwa nyi sahapu yapfo ya fesa njicha

²⁶ naalyo ochichihiṟa kiidi kya Mndumii-Ruwa na iiriya kyamu kyapfo ko Ruwa.

²⁷ Nochimterewa nao nechikuicho, na iyo-uute shaasa shapfo.

²⁸ Na iyo nochikusaṟa idedo nalyo lyechiwutika, na saa yechiwaa njienyi tsapfo.

²⁹ Ruwa nekeombotsa wekudosa, kyaindi kakiṟa wekunyiiṟa.

³⁰ Nekekiṟa ulya alawode mti; Ee Da! Nochikiṟo kipfa kya mawuto hapfo mecha.”