YOBU 21 - Bibilia Kui Mdedie fo Kimochi

Yobu ahaluo

¹ Kiidima Yobu kahaluo:

² “Njiadanyienyi madedo hako ko osaaṟe; nakyo kiwe sia yanu.

³ Tirisienyi kyako, na inyi njechihamba, ngamemaa ideda muengeṟe injitaluo.

⁴ Ale, inyi njideda kya mndu o wandu? Kitewe njiwuṟe wutirisi nyi kiki?

⁵ Njiambuyenyi muṟihiyo shikienyi madumbu hanu na mawoko.

⁶ Ngakusaṟa kya ishi shilenjihoya mbihu foko fuipfa ngapfu na wuowu.

⁷ Kitewe wenyi wukika wai na moo mṟasa inu? Nkili pfinya tsawo tsaengeṟeka mṟasa wukunyi?

⁸ Wakawewona wana wawo wechiiṟimiṟa, na oshari lowo lochiwada pfinya.

⁹ Kowo orio kindo nyi olele kulawode wuowu; manya olio lo Ruwa luwakoya-pfo.

¹⁰ Ee da, mbe tsawo tsose tsepfumbuka, tsekeshaa necha kulawode-ikumba.

¹¹ Wana wawo wakoku nekechumia nawo cha po; wana wawo wakawada temo;

¹² Wakatema msinango fo mtingo na wuda, wakachihiṟo nyi ṟu lya mtoṟiṟo.

¹³ Wakawada sia mfiri ya moo yawo, Wakasokya ko waṟumu na ofoṟo.

¹⁴ Wakawia Ruwa, ‘Lekana naso! Lukaundi imanya mbonyi tsapfo-pfo.

¹⁵ Ruwa menyi pfinya nyi kiki mṟasa lumṟundie? Nyi kiira kiki lochiwona ilyi lochimterewa?’

¹⁶ Iiṟimiṟa lyawo lyikeri mawokonyi hawo? Menge ya wukika ikae haleshe na inyi.

¹⁷ “Nyi kenga ulemewona taa ya wakika yerumisho mkonu fo kiwi fukawachea? Na Ruwa kawaheṟia mawawio na nyashi?

¹⁸ Wakawa cha shiwale shiumu, cha muulu fuidao nyi otanu?

¹⁹ Mokehamba, ‘Ruwa nekedika wana wa mndu wuwicho woke natao amonyi, kundu nawumanye.’

²⁰ Meso hake hamenyi hawone wunyamaṟi woke, wawenyo na nyashi ya Mndumii-Ruwa.

²¹ Nyi sia njiki wawode kiidi kya oshari nduma yake, Matala ha meeri yake ilamemaa idumbuyo makidi hawi?

²² Ngesa kuwode mndu ose echiidima ilosha Ruwa wuṟango? Nao nyi ekeanduya wai huye.

²³ “Mndu nekepfa ashikie oweṟehu lo iwanda lyake, aichuo sia sele na isia moo necha.

²⁴ Aichuo mafuda mbihu foke na mafuo hawode pfinya.

²⁵ Ungi kapfa amsokie nyi fowa ing'any i mrimenyi, alawode ma kicha kimu alesonja.

²⁶ Manya kudo wose wekepfa na iṟiko, na ishikio na makuṟu.

²⁷ “Adanyienyi, njiichi makusaṟo hanu hose, na chila yanu yenjimina.

²⁸ Mochiwesa, ‘Yeku mba ya mangi? Yeku mba ya mowuta sha owicho?

²⁹ Mulemewese weida njienyi mukadikiana na oloho lowo.’

³⁰ Ke wewuta sha mkika wekeringo mkonu fo kiwi, na ikiṟo mkonu fo nyashi yake?

³¹ Naacho echidedia mndu mnyamaṟi, ang'u echimtaaya shilya aṟundie?

³² Kiheri kedao rinenyi, wuringi wochiwiko handu amṟike.

³³ Wandu wafoi wechimuosha numa na wengi - se wakamsongoya. Kaṟiko, teri ikawihiṟio kyombo ho - kyomboho.

³⁴ Nyi wuda mochiidima injiwihiṟia moo na madedo ha wulya? Madedo hanu hawode kindo kyose-pfo nyi wongo tupu.”