YOBU 20 - Bibilia Kui Mdedie fo Kimochi

Madedo ha Sofari ha kawi

¹ Naalyo Sofari, Mnaamathi, kahaluo,

² “Makusaṟo hako hanjitewa njihaluo, ma njechiidima itirisia - pfo.

³ Ngaicho madedo hetutuma njilechiidima ikarishia, mahiyohako hanjitewa njihaluo.

⁴ “Iyo nohadimie mbonyi i lang'u, ke wokia kacha Ruwa naleumba mndu wuyanenyi;

⁵ mnyamaṟi nechiwona nawinga ko meeke mwangu tupu, sia ya mndu alai sumhana na Ruwa nyi ya oweṟe

⁶ Mndu mnyamaṟi nechiidima ikudosa mṟasa nginehu, mdo foke fukashika mapuchinyi.

⁷ Kyaindi nechikumbo kuleshe cha madifi hake amonyi. Walya wawemiichi ilyi mboko wechikuwesa: ‘Nyiku ai?’

⁸ Nechidekadeka cha ndodo, elechiwoneka-se, nechideka cha mawonesiyo ha kio.

⁹ Msa alemembona, echimbona se-pfo, ma alya handu awekekaa kochimanyika se-pfo.

¹⁰ Kimbaṟi o amonyi nawihiṟe masaa hake hose, wana wake wechiterewa isaṟyo ko wakiwa.

¹¹ Ma chandu awekuisuo ke naichuo pfinya tsa uwanake, indi shose shechilaa kimu nao kilulinyi.

¹² “Dumbunyi lyake kuwode wuwicho wuiloda cha sukari, kawuṟika wanda ya olimu loke;

¹³ akundi ilekana nawo-pfo, nakundi iluwadia dumbunyi lyake.

¹⁴ Indi wuwicho wo wukaoloka ndewunyi wokewawa, wuwode wuṟoi cha njoka.

¹⁵ Mbicho nekemeṟa masaa ha mbari na ihadaika; Ruwa nekehawuta ndewunyi yake.

¹⁶ Kindo mndu aionga nyi wuroi wo njoka, nechipfa alaso nyi njoka.

¹⁷ Echikaa na moo nawone osaṟio chandu luicha-pfo, ma shimeda sha iṟimiṟa lya msuṟi pfo.

¹⁸ Ndunda tsa mbiṟuko foke nechitsilekia, echiwada pfinya yetsisonja pfo.

¹⁹ Kipfa nalerumatsa wakiwa kawada, karakuo mba alatsiwikie.

²⁰ “Kipfa kuwode mtsitsionyi fo itandaluo ndeu tsake-pfo, ma ikiṟa kilya kyenyi wuhuru.

²¹ Nalemarisa ilya nalatsuhaṟe ma ngoko, ko ikyo iiṟimiṟa lyake yedekadeka oweṟe.

²² Owerihu lo iṟimiṟa, wukiwa wochimhoya nesokio nyi fowa kipfa wukiwa wung'anyi,

²³ Chandu echitambahana iihutsa ndeu yake nechikoyana na tuke ya Ruwa impusukie cha kando kake.

²⁴ Kofia nechiidima ikushowa na oshu lo menya, Ate nechi wooho na oshu lo aṟeṟa.

²⁵ Wechisoṟomuo mfi mbihunyi koke; kindo kya mfi kechiwuto mhongonyi koke kechiakaaka, wuowu wo opfu shechimraya.

²⁶ Masaa hake hekenyamaṟika, modo fo ṟiho fochimrumatsa, kilya kechitsuhaa kanyi koke kechirumatso.

²⁷ Ngina yechishikuo wuwicho woke, na oruka lochikuloṟa kundu lumine.

²⁸ Masaa hake hechirakuyo mkonu fo tuke ya Ruwa.

²⁹ Ikyo nyikyo mndu mbicho ekeinengo kiwukie ko Ruwa, nyikyo mndu mbicho eketalyio nyi Ruwa.”