YOBU 2 - Bibilia Kui Mdedie fo Kimochi

Satana aheshase Yobu

¹ Kikashika se mkonu fumu wana wa Ruwa walehenda ikooyana oshangunyi lo Ruwa, na Satana kawehenda kimu nawo.

² Mndumii-Ruwa kawesa Satana, “Iyo nyi ku owuka?” Satana kahaluo Mndumii-Ruwa, “Ngawuka ichumia chumia na itengeta ipfo na ipfo wuyanenyi.”

³ Mndumii-Ruwa kawia Satana, “Kofia na uichi Mṟundi oko elaho nyi Yobu. O nyi mndu mhoṟotsu, aowoye Ruwa na ikushowa na orio mbaṟi yose ya wuwicho. O nambanzi kiidi kya wuindi na chandu ulemkumba koko kundu njimrumatse kya wulya kulawode tewe.”

⁴ Satana-kahaluo Mndumii-Ruwa kambia, “Kichong'u kwi kichong'u, ee da mndu nechiwuta shose awode kipfa kya moo foke.

⁵ Wulalu kehoṟuo owoko lopfo nopaaye moo foke nochiwona chandu ekudicha na ilekana na iyo, na ikuruma nawekuruma na pata.”

⁶ Kyasia Mndumii-Ruwa kawia Satana “Kyasia kumbutie chandu ochiidima kyaindi ulambaahe.”

⁷ Kyasia Satana kawuka oshangunyi lo Ruwa, kalisa Yobu wukiwa kui ndaṟe ya mndu yekusuwa mbihu fose wokia owayo lo odende itane ododo lo mdo.

⁸ Katana awada kyoko kakusuwa nakyo; kadamia ifunyi.

⁹ Mka oke kamwambuya kambesa, “Naawo okunda iwadana na wuhoṟotsu wopfo? Kulekanyie na Ruwa upfe nakamu kota olya kudi wukiwa.”

¹⁰ Yobu kahaluo mka oke kambia, “Iyo nyi ukeri ideda cha umu o waka watondo. Luleambia shicha shifoi shiwukie ko Ruwa, kitewe lulehe na ishi shiwicho shiwukie koke nyi ki?” Kiidi kya shindo sho-shose, Yobu alededa wodekio Ruwa-pfo.

Wambuya waṟaṟu wa Yobu wacha

¹¹ Kikashika wambuya wa Yobu wekiicho mbonyi tsake na shindo shilemhoya, wakacha wawuka kanyi kowo; nawo nyi Elifasi Mtemani, Bildadi Mshuhi na Sofari Mnaamathi, wakaidikiana kimu ke wahende imbihiṟia moo.

¹² Wai haleshe walembona walammanye. Wakairia maṟu hawo wakafihiṟa, wakaola kiluli ipfo huye ya mdo yawo.

¹³ Kiidima wakadamia kilulinyi hamu na Yobu mkonu mfungade kio na mfiri, kulawode ma umu alededa nao kidedo kyose kipfa walewona chandu matuuro hake hang'anyi mnu.