YOBU 19 - Bibilia Kui Mdedie fo Kimochi

Yobu ahaluo: Njiichi mkiṟa oko nai na moo

¹ Naalyo Yobu kahaluo kahamba,

² Mochinjiwichuṟa mrima foko mtano- iindi, Nainjifunjafunja kwi madedo?

³ Momenjinyeṟe ka-ikumi; nyi sonu njiwutia mbonyi injiumu.

⁴ Ma kokoya njii mdeko, Deko lyako lyii koko njimonyi.

⁵ Kokoya mokuirinyisha kiidi kyako Na ihaluo sonu yako kideda kyanu.

⁶ Manyenyi na pata ke-Ruwa nanjitewa njideko, na injioṟowia na ndusu tsake njioke maraushi.

⁷ Ambuya njifihiṟa, wukika, kuwode monjiicho-pfo; Njifihiṟia ndarama, ma kuwode mwanduye - pfo.

⁸ O nashingie njia yako ndaidime iida, kawewika meema kiidi kya njia yako.

⁹ Nanjiatuo kiṟumi kyako, kanjisoka oṟo mdonyi koko.

¹⁰ Nanjifunja njora tsose, na inyi ngasia; kikusiriokyako kakikuṟuo cha ikidi.

¹¹ Naichuṟa tuke yake ora loko, kanjiambuya cha mkituwa oke.

¹² Kituṟu kya wandu kyanjichea ki-kimu, kiṟeheṟie njia yenjichea wakawika kiwaha keṟengichia mba yako.

¹³ Ruwa kawika wanawawama haleshe na inyi; mbuya tsako nene wanjidicha piu.

¹⁴ Washari wako na mbuya tsako, wanjitarama-sepfo.

¹⁵ Wahenu wa kanyi koko wanjihadima; waṟundi wako wa kika wanjiwonyi cha mhenu. Ngawa cha mndu walamiichi.

¹⁶ Ngalaha ilea lyako kyaindi lyiilaidikie, ngalilembalemba kwi madedo.

¹⁷ Mṟufu fo dumbu lyako fuwichuṟie mka oko, ngawesuika ko wanawawama wako.

¹⁸ Wana watutu wakawenjimina, wakanjiwona wakanjitaluo.

¹⁹ “Mbuya tsako tsifoi wekesukio nyi inyi, walya njiwewakundi wanjikumba mhongo.

²⁰ Mbihu foko fowa mafuo na njonyi, ngakia kirenge shindo shose shamdeka.

²¹ Njisaṟienyi, njisaṟienyi lanye mbuya tsako; kipfa owoko lo Ruwa lonjichona.

²² Nki ilyi munjilisa wukiwa cha Ruwa wai? Mbihu foko fumushikie?

²³ “A kima madedo hako hawechiṟehio! Kiima hawechiṟehio kitapunyi.

²⁴ Kima hawechitarucho kui menya na kalamu ya mtsiri, ihohu kundu hakae ho kiheri kileshe!

²⁵ Kyaindi njiichi ke mongawo oko nyi ai na moo. Numa nechihoṟoka iya orukenyi.

²⁶ Na nduma ya shichong'u shako inyamaṟika, na mbihu - fu ilyi fochisia, nyi njechiwonana na Ruwa oko.

²⁷ Inyi njechiwonana nao inyi njimonyi, na meso hako hechimwambuya manya chi ungi - pfo.

²⁸ Nyo mochiidima ihamba, ‘Nyi wuda lochimina kipfa wuwicho wulewono koke.’

²⁹ Owuonyi oshu, kipfa ihoṟuo kwi oshu kuwode tuke, muwemanya ke kuwode mwanduye.”