YOBU 18 - Bibilia Kui Mdedie fo Kimochi

Bildadi adeda: Ruwa nekehoṟuo wadeko

¹ Naalyo Bildadi, Mshuhi, kahaluo na ihamba,

² Ale, mṟasa indii ochilasa madeko kwi mdeho? Kusaṟe numa udede.

³ Lotalo lui mando hai na moo kipfa kya iki? Kake lui ngafu mesonyi hapfo?

⁴ Iyo okekuranduo kumonyi kiidi kya nyashi yapfo, Nokusaṟie wuyana wochideo kipfa kyapfo iyo? Ang'u ngaṟahamba lyechiwuto handu halyo?

⁵ Ee dasa ya wamkika yechiruma ma olewo lo modo foke fochilimika pfo.

⁶ Saa ya ihemenyi lyake yechiwa meema, na taa ii huya lyo yechirumisho.

⁷ Ndifo tsake tsa pfinya tsechipeṟehetso, na mbonyi yake amonyi yechimuolotsa wanda.

⁸ Kipfa namkumbe kiidi kya ndusu tsinjioke maṟaushi na madende hake amonyi, nao kahenda huya maṟaushi.

⁹ Iraushi lyechimbada shishindo na mdeho fochimbada.

¹⁰ Namṟikie raushi wanda, na udeko kawikio-njiehu.

¹¹ Shifahio shamneenga wuowu orio-ora, Na imbingia kufui na shishindo shake.

¹² Pfinya tsake tselio-nyi njaa, na fowa ing'anyi yekuṟeheṟa itsitsa.

¹³ Mbihu foke fochilyio hawicho, Ee da, mana mbee opfu lochimlya.

¹⁴ Nechiiro kiidi kya ihema lyake awelikusirie, nadao ko mangi aoweshie.

¹⁵ Ipfo ihemenyi kuwode sa wechideopfo, Modo fo kipiriti fochikumbo handu hake hekaa.

¹⁶ Wanda mri yake yechiumiṟo, Na huye maṟamba hake hechinaa.

¹⁷ Ngumbuo yake yechitsitsa orukenyi, Echiwada rina mademenyi pfo.

¹⁸ Nechidichiṟo wuka saenyi itane memenyi, Nawingio nawuke wuyanenyi.

¹⁹ Echiwada mana ma mchuku kiidi kya wandu - pfo, ma kochideo mndu handu ho awekeri -pfo.

²⁰ Iwo wa ora lo kiukanyi wechiṟihio mkonu foke cha iwo wa ora lo ngamenyi waleinengo wuowu.

²¹ Nyi lohi nyi wudo kikeri kanyi ko wewuta sha mkika. Na iya nyi ho handu ha ulya alaichi Ruwa.”