YOBU 17 - Bibilia Kui Mdedie fo Kimochi

Yobu aterewa nawade ofoṟo

¹ Mrima foko fouma, mkonu yako yamanda, Rina lyikuṟeheṟie injiambia.

² Na lohi da wai koko wenjitaluo, Riso lyakolyi lyiwawo kowo.

³ Njineenga kindo handu hapfo njiwe mkaṟa ko kipfa kyako, kopfo iyo kumonyi Nyiu echikunda iwa mkaṟa?

⁴ Kipfa-nochingie wuṟango wowo imanya, ko ikyo ochiwalekia wanjiwinge-pfo.

⁵ Icho moolongia mbuya tsake wawe nyama njilase, Ma meso ha wana wake hechiwona meema.

⁶ Nanjihaluo njiwe oṟaayo ko wandu; ngasuika na pata ko wandu.

⁷ Riso lyako lyawa meema kipfa kya mchenyeṟe, na orio kiungo kyako kifanana na kiṟinje.

⁸ Walya wewuta shicha wechiṟihisho nyisho, na-alawode tewe nechitanyo mdeko.

⁹ Indi mndu o lohi nechichumia njienyi tsake, na awode mecha neengeṟa iwada pfinya.

¹⁰ Indi wuyenyi, nyo moose, njoonyi wulalu, manya njechiwona mndu mlaanyi kiidi kyanu - pfo.

¹¹ Mkonu yako yaida makusaṟo hako hadeka, ma-iho hai mrimenyi koko.

¹² Noidima iilacha kio kikawa mfiri kohamba, sa ai kufui kipfa kya meema.

¹³ Ngaambuya kya ko waṟumu iwe mba yako, ngaweala kitaṟa meemenyi.

¹⁴ Kokoya ngalaha inyamaṟika, Iyo nyi ndeako; Ngawewia itambacha, Iyo nyi wama oko na mshiki oko.

¹⁵ Aka kikusirio kyako nyi kio kii? Na nyiu echiwona kikusirio kyo kyako?

¹⁶ Lyechisokia sombonyi tsako waṟumu, Ilyi kochiwada sia kilulinyi.