YOBU 16 - Bibilia Kui Mdedie fo Kimochi

Yobu adeda se ke awode kindo atehie pfo

¹ Naalyo Yobu kahaluo, na ihamba,

² Ngaicho madedo hafoi hafananyi na iho; nyo mose nyi wandu wewihiṟia moo welisa wukiwa.

³ Ngesa madedo halawode kiira hechiidima iwada mtsitsio? Ang'u nyi kiki kechiidima ikusuiṟa-itane ohaluo?

⁴ Manya inyi njiwechiidima ideda cha nyo; Kokoya ngoo tsanu tsiwechikaa handu ha ngoo yako, njiwechiidima iṟeheṟa madedo huye yanu.

⁵ Kyaindi njiwemuwika pfinya kui dumbu lyako na makusaṟo helembalemba na dumbu lyako hawemusiṟa moo.

⁶ Manya chandu njideda fowa yako kuwode monjitarama pfo; Ma kokoya ngatirisia, kiki kyatarama ho?

⁷ Indi wulalu nanjitewa njilehele wandu wako wose nawahaluo ngafu.

⁸ Nonjiwada mnu, kowewa mṟingishi huye yako, ngawewona chandu njii mpootse oshangunyi loko.

⁹ Nanjiranduo kiidi kya ihoṟuo lyake, kanjiwonyia; kanjiimadia ngamru huye yako Mkituwa oko nanjituluya meso mawawo.

¹⁰ Waaṟama na madumbu hawo; wakanjikapa nguchu wenjiruma; wekekooyana wose handuhamu kipfa kyako.

¹¹ Ruwa nanjiwika ko iwo wadekie, kawenjikumba mawokonyi ha wadeko.

¹² Njiwekeri kiidi kya sia, nao kanjifunjafunja;- Ee da, nanjiwada nzingo, kanjipoṟipotsa, kake najihoṟotsa, njiwe kyaacho kyake.

¹³ Wekapana na mfi wanjiṟingichia-kosekose, wekepaṟa shiho tsako, walanjisaṟie, Shiulu shako nashiletsia huya oruka.

¹⁴ Nanjifunja kwi wuneesi wo ifunja, kanjisaṟia cha indo lyii ngarama.

¹⁵ Ngapfuma nguwo ya ikunyia huya mbihu foko, na pfinya tsako ngatsikumba kilulinyi.

¹⁶ Kyaamu kyako kyanyamaṟika kya iwuta mchenyeṟe, Na meema fui mbawenyi tsako.

¹⁷ Ma chandu kulawode wuwicho mawokonyi hako, Na iterewa lyako na lyilyicha.

¹⁸ Iyo oruka, kulashikie samu yako, na kieṟeṟo kyako kilawone handu hesia moo.

¹⁹ Ambuya ma wulalu, mṟingishi oko nai ruwehu. Na icho echinjikaṟa nai huye.

²⁰ Mbuya tsako tsekenjimina, Kyaindi riso lyako nyi lyiletsia Ruwa mchenyeṟe;

²¹ Kima mndu awechiidima ideda na iwia Ruwa mbonyi Nadede kembutia owingo mndu o wandu oshangunyi lo wamṟasa oke.

²² Kipfa ikamemaa iida maka njiangu, Njechikuhendia njienyi iya njilechiwuya - se.