YOBU 15 - Bibilia Kui Mdedie fo Kimochi

Elifasi adeda lya-kawi

¹ Naalyo Elifasi, Mtemani kahaluo;

² “Ngesa mndu mlaanyi nahaluo ko madedo ha wutondo? Ngesa, mndu cho naichuo madedo ha wulya?.

³ Ngesa, mndu mlaanyi nekuwinga ko madedo halawaṟi, ang'u kwi madedo halawode kiira?

⁴ Kyaindi iyo numina wuele wo Ruwa; na ida ulakusaṟa kya Ruwa.

⁵ Wuwicho wopfo nyiwo wuilosha dumbu lyapfo, na iyo kosambuṟa ideda cha walembi.

⁶ Madedo hapfo kumonyi nyiho hakuanduya chi inyipfo; nyi madedo hapfo hakuṟingishia.

⁷ “Ngesa, iyo nyi mndu o kuwooka ifeo? Ngesa, iyo nyi ulefeo mafumvu halamewiko?

⁸ Ngesa, nulemedamya kiidi kya chila ya Ruwa? Ang'u nyi iyo kumonyi ui mlaanyi?

⁹ Nyi kiki ukiichi so lulakiichi? Nyi kiki omanya so lulakimanye?

¹⁰ Kiidi kyadu kuwode wameeku wawode wulaanyi; wawode maka ifoi kota ndeo.

¹¹ Ale, Ruwa kakuwihiṟia moo nyi kitutu mnu? Ang'u idedo lyake lya wuhoo chi kindo?

¹² Nki ilyi mrima fopfo fukuloṟa isuo? Na meso malang'a italuo

¹³ itane odekio Ruwa na ihamba madedo mawicho cha iho?

¹⁴ Mndu nyi kiki itane awa mwele? Ang'u ulya amfee nyi mndumka naidime iwa mcha?

¹⁵ Kokoya Ruwa aidima ikusiria waele wake, ma ngina tsi njicha koke-pfo,

¹⁶ Kyawa kida mndu o wandu adekio na ifana ngafu mndu o wandu ekewuta mawicho cha inyo mṟinga!

¹⁷ “Wulalu njiadanyia, na inyi njikuloṟe, njikuwia shilya njilewona,

¹⁸ shiloshio sha wenyi wulaanyi, mbonyi waku wawo walaleṟika,-

¹⁹ iwo Ruwa alewainenga oruka lowo wawenyi, ma kuwode mhenu aleida kiidi kyawo pfo.

²⁰ Mndu mbicho nyi echilya wukiwa mkonu yose, maka yose waneesi waleteṟio.

²¹ Kifahiyo keowesha kechiichio madunyi hawo, kiheri echikusaṟa wulalu nawuyo mmoo, monyamaṟa nechimchea.

²² Mndu mbicho awode kikusirio kewuka meemenyipfo, opfu lo oshu nlo mtsitsionyi foke.

²³ Nekeṟahaṟaha kechishiha kando kehamba, “Nku kai?” Naweichi ke mfiri fo meema fui hafui.

²⁴ Wukiwa na waale, shamwowesha; shamwoosha cha mbahanyi tsa mangi tsi shidenyi.

²⁵ Kipfa nahoṟuo owoko loke ko Ruwa, kakaria ikapa Ruwa menyi pfinya;

²⁶ kawikia mteeṟa kwi orikiki lokapana, kunu nawode ngawo ya shiṟiṟima shing'anyi.

²⁷ Kyaamu kyake kakinuṟisha na mafuda, na kitsi kyake kiichuo mafuda.

²⁸ Nalekaa kiidi kya mṟi iledeo mrapu, kiidi kya mba tsilakekao na mndu, mba-tsiwewaṟi tsiwe mfoo fo orumatso.

²⁹ Mndu cha icho echiwa msuṟi pfo; manya wusuṟi woke wochilungana wuyanenyi pfo.

³⁰ Echiidima ikushowa na meema fo opfu-pfo. Njolimi tsa modo tsechiumiṟa njana tsake, shiwaṟo shake shechiwiwito nyi otanu.

³¹ Nanga nade ikusiria wutondo na ikulemba, kipfa wutondo nyi wo oṟo yake.

³² Nechitao kisumhanyi ipfa lyake lilandeshike, oshari loke lochikaa mlungana-pfo.

³³ Nechiwa cha msabibu fuiaṟawutsa ndunda njiwishi, cha msinepfu fuaṟawutsa shiwaṟo shalyo.

³⁴ Iwo wose walaindia Ruwa wechiwona wana-pfo, modo fochirumatsa mahema ha wesutsumo.

³⁵ Wekekusaṟa wongo na ifee wuwicho, mrima yawo nyi iṟeheṟa wulembi.”