YOBU 14 - Bibilia Kui Mdedie fo Kimochi

¹ “Mndu nyi mana o mndu mka, mfiri yake ya moo nyi sa njiangu iichuo mawina.

² Nekewaṟa cha kiwaṟo, nduma kanaa. Kadicha cha kiṟinje na idekadeka.

³ Hoi Ruwa, nkili ukusaṟa kyake, komwambia, kowoka ideda nao?

⁴ Nyiu echiidima iwuta kindo kicha kiwuke kiidi kya kindo kifanyi? Kuwode echiidima pfo.

⁵ Mfiri ya moo fo mndu injiheshe; iyo Ruwa noitalie na meeri yake; echiidima irunduka mtsitsionyi fulya ufuwikie pfo.

⁶ Ambuyang'u mbai, umde, kundu nachihiṟo, mfiri yake cha mndu motao kwi mfiri fumu.

⁷ Kipfa komanya ikidi kuwode kikusirio ke lyechioṟa na ing'ana.

⁸ Mri ya ikidi lyo yechikuuya terinyi, na itsuwa lyalyo likarumara terinyi.

⁹ Kyaindi mchoweṟa kitutu likaoṟa, lyikawewuta maṟamba cha njana.

¹⁰ Indi mndu kapfa nafo mtsitsionyi foke, kalekia moo nyi kiki echitsuhaṟio?.

¹¹ Chandu mṟinga fokesia nduwenyi, na meda fulakisotse-se mṟinga,

¹² nyi wudo mndu ekepfa echikure-se-pfo echikure ma ikakangaṟika pfo, mṟasa maruwehu hadekedeke.

¹³ “Kima ulenjiowisha ko waṟumu, njiwechikaapfo mṟasa nyashi yapfo ihuo; na kiheri kilya uteseheṟie kikamesia nuwechinjikumbuo.

¹⁴ Ngesa, mndu kapfa nechiidima se ikaa na moo? Mfiri yako yose ya maṟunda njiwekuweda mṟasa kiheri kepfunguyo kishike.

¹⁵ Kiheri kyo muwenjilaha, na inyi njiweidikia, kiheri ukundi injiwona inyi kiumbe kyapfo.

¹⁶ Naalyo uwechiidima itala ndifo tsako, nuwechida iimehia njonyamaṟo tsako,

¹⁷ madeko hako hawepfungio ikunjenyi, iyo nyi uwechishikia deko lyako.

¹⁸ “Kyaindi mafumvu hekeoloka, na mangaṟahamba hakakuṟuka handu hawayo.

¹⁹ Mṟinga fukasoka fukesema maṟaṟa mvuo ing'anyi yekewuta ngoko. Na wudo iyo okenyamaṟa kikusirio kya mndu o wandu.

²⁰ Iyo nokeolotsa mndu o wandu nao kadekadeka mlungana; nokeilacha kyamu kyake na imkumba kuleshe.

²¹ Wana wake wakaṟumisho, o aichi kindo-pfo. Wakaolotso, o awonyi kindo-pfo.

²² Nekekuicho mawawio ha mbihu foke na ifihiṟa kya mkao foke mbicho.”