YOBU 13 - Bibilia Kui Mdedie fo Kimochi

Yobu aengeṟa ihaluo

¹ “Ambuya, isho shose meso hako halewewona, na madu hako hakaicho na imanya.

² Isho mushiichi nyo, na inyi naawo njiweshiichi. Inyi chi kindo kya wulya kota nyo pfo.

³ Kyaindi njiwechikunda ideda na Ruwa menyi pfinya, njilangie njidede oshangunyi lo Ruwa.

⁴ Kyaindi nyo muitambahana ihaluo wongo iwe lohi; nyo nyi wahanga wa wulya.

⁵ Nyi-nanga muwechitsia sau, wandu wakakusaṟa ke mui wenyi wulaanyi!

⁶ Adanyienyi wulalu madedo hako, njiadanyienyi ilyi njideda.

⁷ Ngesa, nyi mukusaṟie muiṟundia, Ruwa kwi ihamba wongo? Mukusaṟie ideda kwi mtambo kotarama kindo?

⁸ Ngesa, mui ihesha ikundia Ruwa? Ngesa, muitarama Ruwa mengenyi?

⁹ Ngesa, mukusaṟie kulako mochiidima ilemba Ruwa cha wandu?

¹⁰ Lohi nechimudedia ilyi mochiloṟa ikundia kwi kiṟika.

¹¹ Muowoe wuitoṟi woke? Muwode wuowu kipfa kyake?

¹² Madedo hanu nyi njoṟaayo tsa ifu, madedo hanu hai otiṟiwa lo teri.

¹³ “Tsienyi, na inyi njidede, shinjikooye shilya shenjikooya.

¹⁴ Njikuṟeheṟie ireka moo foko:

¹⁵ Ruwa nanjiwaahe kakunda, njiwode kedetsa pfo, manya kudo njechihamba kirianyi na ohendo loko oshangunyi loke.

¹⁶ Ngaidima iki njechiwa ngawinza, kipfa mndu mnyamaṟi echiidima ihenda oshangunyi loke-pfo.

¹⁷ Njiadanyienyi ko osaaṟe madedo hako, ishi njimuongoya shishike madunyi hanu.

¹⁸ Mondu foko njikuṟeheṟie kyafo kichikichi, njiichi na pata njiwode kindo njiwutie pfo.

¹⁹ “Nyiu echiidima ilehana na madedo hako? Njikuṟeheṟie itsia na ipfa.

²⁰ Hoi Ruwa oko, njisaṟia ishi shiwi, na inyi njechiowa aleshe na iyo pfo:

²¹ Kenjiwuta owoko lopfo lunjikapa, manya ulanjirumatse kwi nyashi yapfo.

²² “Uwooke ideda madedo hapfo njikuhaluo. Ang'u inyi njiwooke, na iyo unjihaluo.

²³ Madeko na njonyamaṟo tsako nyi henga? Njiwia wukika na wunyamaṟi woko.

²⁴ “Kitewe ohaluo kyamu kyapfo kuleshe na inyi? Nkili uinjiwutia cha mkituwa opfo?.

²⁵ Ngesa, nochiowesha iṟa, liwiwito, ang'u iwingia mafila?

²⁶ Iyo nochiwonya owingo lung'anyi na injidika njonyamaṟo tsa uwanake woko.

²⁷ Nonjipfunga na mshe madende hako, koimehia ndifo tsako tsose, kowewikia njayo tsako mtsitsio.

²⁸ Na inyi njisia cha ikidi lyiporu, cha nguwo injilye nyi kase.”