YOBU 12 - Bibilia Kui Mdedie fo Kimochi

Yobu ahaluo

¹ Naalyo Yobu kahaluo,

² “Necha! Nyo nyi wandu wa wulaanyi. Wulaanyi wochipfa kiheri kilya mochipfa.

³ Inyi njimonyi njiichi cha nyo. Inyi chi njilai kindo kota nyopfo. Shose mlededa orio mndu naichi.

⁴ Kiidi kya mbuya tsako ngawa kindo kyesetsa; inyi njileterewa Ruwa kanjihaluo, inyi njii mhendelyi njilawode tewe, ngawa kindo kesetsa oshangunyi lo wandu.

⁵ Mndu asie moo nekemina ipfiio; mndu cha ichu ipfiio nekewona nyi ko walya warendia.

⁶ Kanyi ka wasoki kuwode ofoṟo; wesohuo Ruwa mondu wai olele-wyoo pfinya tsawo ni ruwa owo.

⁷ “Kyaindi-wesa mando hai na moo hechikulosha, wesa malehe naho hechikuwia.

⁸ Ang'u wesa maṟa na mashidi hechikulosha, deda na makunga hakuinenge mbonyi.

⁹ Kiidi kya ishi shose nyiu alaichi, nyi owoko lo Mndumi lutanyie ishi?

¹⁰ Moo fo orio kii na moo fui mawokonyi hake, na wudo na mṟufu fo mndu o wandu.

¹¹ Ngesa, kadu kokehesha madedo cha olimi lokesonja kando?

¹² Wulaanyi wui ko wameeku, wuṟango nyi kowo wui kipfa kya moo fowo mleshe.

¹³ “Indi wulaanyi na wuṟango nyi sha Ruwa amonyi, o nawode wuṟango na wuaria.

¹⁴ Kawunduo kuwode msa echiwika wuhya pfo, kapfunguo-mndu, kuwode mompfunga pfo.

¹⁵ Kashinga mvuo, oruka lukauma, kalekia mvuo oruka lukawona mboṟa.

¹⁶ O nawode pfinya na wulaanyi; wekelembo na ilemba nyi wake.

¹⁷ Nekewuta wesoṟa mbonyi wahende kitaṟe, kawehaluo wachili wawe matondo.

¹⁸ Nekesoka wamangi kofia tsawo; kapfunga shitsi shawo na shiwoho sha wapfungo;

¹⁹ Nekeleka wakohanyi wachumie kitaṟe, kaolotsa wenyi pfinya.

²⁰ Nekesoka wesoṟa wuṟango wowo wodeda, kawesoka wameeku wulaanyi wowo.

²¹ Nekesotsia wanene sonu, kawesoka wai ngohoda pfinya yawo.

²² Nekeshikuo njoṟoo tsa meema, kairia huye ko sa shilya shii meemenyi.

²³ Nekeng'anyisha mkambo ya wandu kaweharumatsa, kahang'anyisha numa kaharahanyitsa.

²⁴ Kasoka wasongoru wa wandu wuṟango wowo, wakaṟahaṟaha kundu ko olele kulawode njia.

²⁵ Wakawadawada meemenyi kulawode-sa, wakatandauka cha wananzi.”