YOBU 10 - Bibilia Kui Mdedie fo Kimochi

Madedo ha Yobu ha ifurumia

¹ Ohendo loko lo moo lochisuiṟa! Njideda njechinunuwa kulawode monjiima. Kilya kitewa mrima foko fukawawa-njechikihamba.

² Njechiwia Ruwa: Ulanjianduye Kunjiwie kitewe kekapana na inyi.

³ Ngesa, kikuchihiṟie injiwonyia, komina iṟunda lya mawoko hapfo. Kochihiṟo na oloho lo wadeko?

⁴ Ngesa, nowode meso cha ha wandu? Kowewona chandu wandu wekewona?

⁵ A mkonu yapfo na cha ya wandu? Ang'u maka yapfo na cha ya wandu?

⁶ Itane oṟisa deho lyako, na ishiha wunyamaṟi woko?

⁷ Iyo noichi njiwode tewe pfo, ma kuwode monjikiṟa owokonyi lopfo pfo.

⁸ Mawoko hapfo halenjiwumba na injiwika, indi wulalu nohaluka injirumatsa.

⁹ Kumbuo nolenjiwumba kwi teri, ngesa, nochinjiwihiṟa se kilulinyi?

¹⁰ Aka chi iyo ulenjiletsa cha maruwa, cha matuṟi ha maruwa?

¹¹ Nolewumba mbihu foko ko mafuo na mri, koweshikia mafuo hako na njonyi na nyama?

¹² Konjisumba moo na isaṟia, iembeṟa lyapfo lyikanjineenga sia na wusalari wo moo.

¹³ Manya kudo mbonyi tsi nowetsiṟikie mrimenyi. Kyaindi mbeichi ke nyi mbe mahio hapfo.

¹⁴ Noweiwedia uwone kulako, njiwewuta wunyamaṟi, Kundu nolehe injihoṟia wuwicho woko.

¹⁵ Kokoya inyi, njii mbicho, ochia loko! Kokoya ndawode wuwicho, njechiidima ikuṟumisha-pfo, kipfa njiichuo ngafu, njechiambuya matuuro hako.

¹⁶ Kokoya ngairia mdo fu foko nuinjilasa cha mwiso na injipoṟipotsa na mbonyi tsapfo tsa ṟiho.

¹⁷ Orio kiheri nyi uwode wuṟingishi kyako, koengeṟa nyashi yapfo kipfa kyako, kowenjiendie wakituwa wahya kundu wanjikape.

¹⁸ “Ee Ruwa, nki ili ulenjiwuta wusunyi wo wama? Kiwechichia kokoya njilepfa wandu walanjiwona.

¹⁹ Njiwedao mṟasa ṟunguni, njifanane na mndu alandewono.

²⁰ Ngesa mfiri yako chi injiangu? Njileka njiwihiṟyo moo kitutu.

²¹ Njilamehenda ipfo njilechiwuya, ipfo orukenyi lo wukiwa na meema rambatanyi.

²² Oruka wukiwa na ngaluko, sa ya orukalo nyi meema tupu.”