YOBU 1 - Bibilia Kui Mdedie fo Kimochi

Satana ahesha Yobu

¹ Kuwewode mndu umu o oruka lo Usi, rina lyake nyi Yobu. Mndu chu nawei o wusumhanyi, naweowoye Ruwa kakuletsanatsana mawicho.

² Yobu nawewode wana mfungade wa womi na waṟaṟu wa waka;

³ masaa hake nyi machondi shiku mfungade (7,000) ngamia shiku shiṟaṟu (3,000) mbe tsiwi tsiwi mahana hatanu (500) na nzoi njika mahana hatanu (500) na waṟundi wafoi, wafoi mnu nakamu; kipfa kya wusuṟi woke kawada kiṟumi kota wandu wose wai ora lo ngamenyi lo isanga.

⁴ Orio kiheri wana wa Yobu wamewika mfuho ko orio umu kwi kamba; wakalaha washiki wawo icha ilya na inyo handu hamu.

⁵ Mfuho fukamesia, Yobu kalaha wana wo kundu-nawaheṟemtse kwi kidaso na mwaano kipfa nalehamba, “Kofia wanawo waleuṟnda wunyamaṟi na ikuiṟingisha mrimenyi yawo wakadekio Ruwa.”

⁶ Kyasia mkonu fumu, wana wa Ruwa wakahenda ikuloṟa oshangunyi loke na Satana kahenda kiidi kyawo.

⁷ Mndumii-Ruwa kawesa Satana, “Iyo-nyi ku owuka?” Nao Satana kahaluo Mndumii-Ruwa, “Ngawuka ichumia chumia na itengeta, ipfo na ipfo wuyanenyi.”

⁸ Mndumii-Ruwa kawia Satana, “Kofia na uichi mṟundi oko elaho nyi Yobu. Ipfo wuyanenyi kose kuwode mndu chaopfo. O nyi mndu mhoṟotsu, aowoye Ruwa na ikushowa na orio mbaṟi yose ya wuwicho.”

⁹ Satana kahaluo Mndumii-Ruwa, “Ngesa, Yobu nakundi Mndumii-Ruwa kya wulya?

¹⁰ Akale kimanyikie na pata chandu iyo umringie njora tsose hamu na wa kanyi koke na orio kindo awode? Iyo kowembikia ona na masaa hake hakaengeṟeka orukenyi.

¹¹ Indi wulalu, kehoṟuo owoko lopfo nopaaye masaa hake uwone chandu echilekana na iyo na ikuruma na pata.”

¹² Mndumii-Ruwa kawia Satana, “Ngakuinenga momu fowuta chandu ochiidima kya masaa ho; kyaindi o amonyi ulampaaye.” Kyasia Satana kawuka oshangunyi lo Mndumii-Ruwa.

Kihesho kya kuwoka kya Yobu

¹³ Kikashika mkonu fumu, wana wa kisoṟo na kika wa Yobu wawei ilya na inyo kanyi ko wawawo.

¹⁴ Kyasia mṟundi kashikia Yobu kambia, “Luwekeri idema na makumbi hekuruyo nyi mbe. Nzoi tsiwelya kufui natso.

¹⁵ Kyasia-Waseba wakaluhoya wakaduo mbe na nzoi, wakawaaha waṟundi kwi oshu. Inyi njimonyi mfi ngakia ngakuendie mbonyi.”

¹⁶ Alamehusa ideda, ungi kashika-kambia, “Owaṟuko lo ikuṟuṟuma lyaoloka likakoṟa na irumatsa machondi na waṟundi wose. Inyi njimonyi mfi ngakia-ngakuendie mbonyi.”

¹⁷ Icho alamehusa ideda, ungi kashika kambia, “Wakalidayo walekuṟeheṟa machekeṟo haṟaṟu wakahoya-ngamia, wakatsiduo-wakawaaha waṟundi wose na oshu. Inyi njimonyi mfi ngakia ngakuendie mbonyi.”

¹⁸ Alamehusa ideda, ungi kashika kambia, “Wana wapfo wa kisoṟo na wa kika wawei ilya na inyo mvinyo kanyi ko wawawo.

¹⁹ Kudi kiwiriwiri kikacha kiwuka nuka ya msanga, kikakapa mba yo wawei njora tsose ikawawundukia, na wanake wose wapfa. Inyi njimonyi mfi ngakia ngakuendie mbonyi.”

²⁰ Kiidima Yobu kahoṟoka, karanduo maṟao hake, kaoda njui tsake, kakukumba wanda na kyaamu kaidapfuma Ruwa

²¹ Kahamba, “Njilewuka wusunyi wo wama njii kitaṟe, na wudo njechiwuka wuyana njii kitaṟe, na Mndumii-Ruwa nalenjiinenga na Mndumii-Ruwa naweduo, rina lya Mndumii-Ruwa liṟumisho.”

²² Kiidi kya shindo shose Yobu alewuta wunyamaṟi-ma ikusaṟa kya Ruwa kui idekopfo.