YESAYA 9 - Bibilia Kui Mdedie fo Kimochi

Mkoku afeo kodu

¹ Kochiwoneka meeke fodicha ma iowa maheri ha ha kiwipfo. Njoruka tsa Zabuloni na Naftali tsiweinjimine ili mbooko, kyaindi maheri-ha tsilewada kiṟumi kufui na njia ya ipalyipalyi; na oruka lui maambatsana na Yordani, mṟasa Galilaya ikeri ya wahenu.

² Wandu walya wawehendie memenyi wamewona ngeela ing'anyi. Walya wawei orukenyi kiidi kya maṟishe ha opfu ngeela yawaṟa huyawo,

³ Noengeṟa mkambo fo wandu, koengeṟa msiha fowo. Waichihiyo oshangunyi lopfo Cha sia kiheri kya shilimu, cha wandu wehawana shilya waende shidenyi.

⁴ Kipfa nyi ulefunja kilunga kya mhanda foke, na ndichi ya kombe lyake, na iṟiinga lyake ichu alembonyia cha mafiri ha Midiani.

⁵ Kipfa shisha sha ichu menyi shisha kiheri kya mtiṟi, na maṟao hamachoweṟe samu, hechikoṟo na isaramaya, hechiwa ngu tseatsia modo.

⁶ Kipfa kyadu lomefeeyo kimana, Lomeinengo mana o womi; Na pfinya ya wumangi ikeri makosohu hake Namdumbuye rina lyake, “Menyi chile” “Ruwa menyi pfinya,” “Wande o mlungana,” “Mangi ya Ofoṟo.”

⁷ Kiheri kya wuitoṟi woke na ofoṟo, shechimanda manya le-pfo. Kiidi kya loṟika lo wuitoṟi wo Dawidi na wumangi woke. Iwuikara na iwuhoṟotsa Kui mwanduye na kui wulohi, Wokia wulalu itane mlungana. Wunyenyi wo Mndumii menyi Matorito wochiwuta wudo.

Ngapo ya Waisraeli

⁸ Mndumii naledikia Yakobo idedo, likashikia Israeli

⁹ Na wandu wose wechimanya, wai Efraimu na ichu ekekaa Samaria, wekededa wai na orikiki na ikuirinyisha mrima yawo wehamba:

¹⁰ “Matufaṟi haomboka, indi so lochiwika mba ya maho hepaṟa: Mkuyu ilemanyo indi so lochiwika mashidi hengi ha meresi handu hayo.”

¹¹ Kui kipfa ikyo Mndumii nechiira wakituwa wa Resini huye yake, nao nasuwie wakituwa wake;

¹² Waashuru wawe kusonguo, na Wafilisti ora lo nduma, nawo wechidapfuna Israeli kui madumbu hamatambaṟuo. Hamu na isho shose nyashi yake ilehalukia kuleshipfo, indi owoko loke lui luhoṟuo itane wulalu.

¹³ Indi wandu wo walehalukia ichu alewakapa-pfo, na ishiha Mndumii menyi Matoṟito.

¹⁴ Kui kipfa kya ikyo Mndumii nechidumbuo kiidi kya Israeli mdo na mṟehese, idawa na natsi, kiidi kya mkonu fumu.

¹⁵ Mmeku moindiyo nyio mdo, na mwikimbi molosha wongo nyi mṟehese.

¹⁶ Kipfa wesongoya wandu-wa nyiwo wekewadetsa, na iwo walesongoyo nyiwo walearisika.

¹⁷ Kui kipfa kya ikyo Mndumii echichihiyo kipfa kya wanake wawopfo, echisaṟia wangoeda ma wakusu wawopfo, kipfa orio mndu nyi afanyi ngafu, naichuo ngafu na orio olimi lokededa wutondo. Kimu na isho nyashi yake ilehalukia kuleshe-pfo, indi owoko loke lui luhoṟwo itane wulalu.

¹⁸ Kipfa wuwicho wokerumatsa cha modo; wokelya mbeche na msha, yee, wokekoṟa ngeṟa na mashidi, wokedo huye kiidi kya mapuchi malemeri ha mtsu.

¹⁹ Kipfa kya nyashi ya Mndumii menyi Matorito oruka lu luirumara piu; wandu wa nawo wai cha ngu tsewika modonyi; kuwode mndu mosaṟia manomaye pfo.

²⁰ Nekesoka ora lo kulyo na iwona njaa, nekelya ora lo kumoso manya eihudapfo, wechilya nyama orio mndu owokonyi loke amonyi.

²¹ Manase nailya Efraimu, na Efraimu nailya Manase, nawo wa wawi handu hamu wechiwa huya Yuda. Hamu na isho shose nyashi yake ilehalukia kuleshe-pfo, indi owoko loke lui luhoṟwo itane wulalu.