YESAYA 8 - Bibilia Kui Mdedie fo Kimochi

Mana o Yesaya awa kichano ko wandu

¹ Mndumii kanjiwia, “Shiha mbawo ing'anyi uṟehie huye yayo na kiraiti, Maher-shalal-hashbazi;

² na inyi njechikuwonyia waṟingishi wahendeli kundu kuwiko mṟeho fo mbonyi, nawo nyi Uria, mkohanyi, na Sakaria mana o Yeberekia.

³ Na inyi ngahendia mwikimbi-cho mka nao kakapika, kafee mana o womi, kiidima Mndumii kanjiwia, ‘Mlahe rina lyake Maher-shalal-hashbazi.’

⁴ Kipfa mana cho alamemanya ideda, wande oko na wama oko, kisa kya Dameski na waledao wapfungo wa Samaria, wechidao ko mangi ya Ashuru.”

Mangi ya Ashuru aicha

⁵ Nduma Mndumii kadeda na inyi lya kawi kanjiwia

⁶ “Kipfa wandu wa waleha mṟinga fo Shiloa fokeida kyomboho, na ichihiyo kipfa kya Resini na manacho o Remalia;

⁷ Kyasia wulalu ambuya; Mndumii naende mṟinga huyawo, mṟinga fo meda fuwode pfinya; mṟinga fo nyi fufoi mnu, nafo nyi mangi o Ashuru na wuitoṟi woke wose; nao nechicha naide huya mfongo yake yose, nechisoka cha mfu fupuike ora lu na ilu;

⁸ nao nechiida kechidicha na iida nashike Yudaya nechisoka na ipuika makidi hawi, nashike nzingonyi, na ili echitambaṟuo makungo hake naichuṟe wulandari wo oruka lopfo iyo Imanueli!”

Ikuṟeheṟa lya wulya lya wandu

⁹ Wikenyi ngaluko, nyo oshari lo wandu, Nyo nyi mochipaṟopaṟo shipeṟengu, Dehenyi madu, nyo njoruka tsii kuleshe, Wanzenyi shitsi, nanyo mochipaṟopaṟo shipeṟengu, Wanzenyi shitsi, muwode wuowu.

¹⁰ Wikenyi chila ya handu hamu, kochiilachika, Dedenyi idedo, indi lilechihoṟoka, Kipfa Mndumii nai naso.

Wuwawaso ko mwikimbi

¹¹ Kipfa nyi wudi Mndumii alenjiwia, kui owoko sa lwapfinya kanjilosha njilahende na wandu-wa, kechihamba,

¹² “Muladede nyi wuṟiingi kiidi kya mbonyi tsi tsa wandu-wa wechihamba nyi wuṟiingi; mulaowuo ma iwuko madima, wuyonyi moo.

¹³ Mndumii menyi Matoṟito nyio mochimtana Mwele; o nawe wuowu wonu, nawe moindio nyi nyo.

¹⁴ Nao nechiwa nyi handu haele, indi nyi iho lyekapa tulia na iṟaṟa lyeolotsa kiidi kya mba tsa Israeli tsose tsiwi, na mdeho ko wenyi wa Yerusalemu.

¹⁵ Na wafoi wechikapa tulia huyake, na ioloka na ifunjika, na ideho na iwado.”

Wuwawaso ulakape sumu na waṟumu

¹⁶ Upfunge wuṟingishi-wo, kapa teeso wuwawaso wu kiidi kya wakiloshionyi kyako.

¹⁷ Na inyi njechiwedia Mndumii, moṟika kyaamu kyake ko wandu wa mba ya Yakobo na inyi njechimwambuya.

¹⁸ Ambuyenyi, inyi na wana wa njileinengo nyi Mndumii nyi lui kichano na ṟiho kiidi kya Israeli, shiwukie ko Mndumii menyi Matorito, o ekekaa fumvu lya Sioni.

¹⁹ Na ilyi mandi wechikuwia shiha mbonyi ko wandu wawode waṟufu wa ngafu na wasawi; wekefihiṟa cha shilehe na iweweda; alewo, kiwaṟi wandu washihe mbonyi ko Ruwa owo? Ale! Wahende ko wandu wapfiie kipfa kya wandu wai na moo?

²⁰ Wahende kui wuwawaso na wuṟingishi, kokoya waladeda kirianyi na idedo li, kulawode kingi kowo kuwode ngamenyi pfo.

Wukiwa

²¹ Nawo wechiida kiidi kyake, waichuo wukiwa wakalio na nyi njaa; handu naho wakamewado nyi njaa, wechinunuwa na ilya nyamu ko mangi owo na ko Ruwa owo na iiria shaamu huye;

²² nawo wechiambuya oruka, luichuo wukiwa na meema; kuwode isambuka-pfo kipfa kya wukiwa, nawo wechifuno na idichia memenyi fung'anyi.