YESAYA 7 - Bibilia Kui Mdedie fo Kimochi

Ndumi ko mangi Ahazi

¹ Kikashika maheri ha Ahazi, mana o Yothamu, mana o Uzia, mangi ya Yuda, Resini Mangi ya Shamu, na Peka mana o Remalia mangi o Israeli, wakado wakahenda Yerusalemu kundu wakapane nao indi walaidime imbinga.

² Nduma wandu wa mba ya Dawidi wakawio ke Shamu waidikiana na Efraimu. Naho wakawuko madima kiidi kyawo, wakawado nyi kitaku cha otanu losingitsa mashidi ha ngeṟenyi.

³ Naho Mndumii kawia Yesaya, wulalu kure, nohende iambia Ahazi iyo na Sheariyashubu mana opfo, ipfo mtsitsioni fo nduwa ya huye, njienyi ing'anyi ya wesanja nguwo;

⁴ umbie-wai ambuya, notsie, kulaowuo ma kulapfe mrima, kipfa kya mchola ii iwi ya shimunyi shidosa mtsu; kipfa kya nyashi ya Resini na Shamu na mana o Remalia.

⁵ Kipfa Shamu ikusaṟie mawicho huyapfo hamu na Efraimu na mana o Remalia wehamba,

⁶ “Ee, ndenyi lukupfunge, ludo luhende ikapana na Yuda na iwalisa wukiwa, luwunduo handu kundu luide na ihoṟotsa mangi ingi mana cho o Tabeeli.”

⁷ Mndumii-Ruwa nahamba adi, “Idedo lyi lyechiwapfo, ma kechiidimika-pfo.

⁸ Kipfa mdo fo Shamu nyi Dameski, na mdo fo Dameski nyi Resini, na kiidi kya maka makumi haṟandaṟu na itanu (65) Efraimu nechifunjika shiteno-teno, alechiwa oshari lo wandu;

⁹ na mdo fo Efraimu nyi Samaria, na mdo fo Samaria nyi mana o Remalia, mulakunde iidikia nyi kya lohi mochiwanga-pfo.”

Kichano kya Imanueli

¹⁰ Kyasia Mndumii kadeda na Ahazi kahamba,

¹¹ “Shiha kichano kya Mndumii-Ruwa opfo; shiha handu kui wanda mnu ang'u handu kui huye mnu.”

¹² Kyaindi Ahazi kahamba, “Otenyi, njechishiha ma ihesha Mndumii-pfo.”

¹³ Nao kahamba, “Adanyienyi wulalu, nyo mba ya Dawidi; Ngesa nyi kindo kitutu konu itewa wandu walehele, mṟasa mokunda Ruwa nalehele da?

¹⁴ Ko ikyo Mndumii amonyi nyi echimuinenga kichano. Ambuya mana mkeha nechikapika, nechifee mana o womi, nao nechimlaha Imanueli.

¹⁵ Mafuda ha msika na wuki nechilya mṟasa, kiheri kyake kesuo mawicho na isambuṟa mecha.

¹⁶ Kipfa kiherikyo manacho alameidima isambuṟa isuo mawicho na iduo mecha oruka lulya iyo usuo wamangi walya wawi lochideo mrapu.

¹⁷ Mndumii nechiende huye yapfo, na huye ya wandu wapfo, na huye ya mba ya ndeo, mkonu ilalemeche, wokia mkonu fulya Efraimu alewuka kiidi kya Yuda; mangi o Ashuru.”

¹⁸ Kake kechiwa mkonu fo Mndumii nechikapa mṟoṟi na wandu wa Misri wechicha cha nzi iwuka shimedenyi sha meda fo Nili; na wandu wa Ashuru wechicha cha njuki tsawuka orukenyi lowo.

¹⁹ Wechicha mapo ko mapo na iichuṟa mapichi, ngaṟahamba tsa maho msha, mchenje na mapatehu kose.

²⁰ Kiidi kya mkonu fo, Mndumii nechiende wembe kuwuka ora lumu lo meda fo Efrati, ke nyi mangi ya Ashuru. Nechioda mdo yanu, na njui tsa madende hanu na ioda ngerero tsanu.

²¹ Kiidi kya mkonu fo kechiwa ke mndu nechilisa taho na machondi hawi;

²² nasho shechikamo maruwa hafoi, nechilya mafuda ha msika; kipfa orio mndu echitsuhaa kiidi kya oruka lu nechilya mafuda ha msika na wuki.

²³ Kake kechiwa kiidi kya mkonu fo orio handu kuwewode msabibu kiku (1,000), ileende fesa kiku (1,000), kochidoho mbeche na msha tupu.

²⁴ Mndu echihendapfo na nahende arie mfi na wuda; kipfa oruka lose lochikoyo luwode mbeche na msha.

²⁵ Na shitoṟomoso shose shishideme na makumbi ochiidima ishikapfo-pfo, kipfa keowuo mbeche na msha, indi kochiwa handu heduo mbe na ilisapfo machondi.