YESAYA 66 - Bibilia Kui Mdedie fo Kimochi

Wuindi wo wongo na wo lohi

¹ Mndumii nahamba adi, “Ruwehu nyi kidi kyako kya wuitoṟi, na oruka nyi handu hako heleṟia madende hako; mochinjiwikia mba njiki? Handu hako hesia moo hai hanga?”

² Owoko loko nyilo lulewika ishi shose, shindo shi shikawutika Mndumii ahamba; kyaindi mnduchu nyio njechimwambuya, mndu ai mfafa, awode ngoo ikunyiiṟie, ichu ekeicho idedo lyako kaliowuo.

³ Ichu moshinja mbe na cha ichu awaha mndu; na ichu awuta kidaso kya ichondi nyi kimu na ichu afunja nzingo ya kite; na ichu awuta mwano foke nyi cha ichu awuta samu ya nguwe; na ichu mopfaamiṟa nyi cha ichu mowikia sanamu ona; ee, wasambuṟa njia tsawo wawenyi, na mbihu yawo ikachihiṟo nyi mawuto mawicho.

⁴ Inyi njechisambuṟa ngapo tsawo, njechiwaamtsia wuowu; kipfa lilya njilelaha waleidikia-pfo; na kiheri njilededa walenjiicho-pfo; indi walewuta mawicho oshangunyi loko, wakasambuṟa shilya njilawekundi.

Ngapo na okiṟo

⁵ Adanyienyi idedo lya Mndumii, nyo muidedema kipfa kya idedo lyake; Wana wa wama wanu wamsuo nyo, walemukumba kipfa kya rina lyako, wahamba, “Mndumii naichiko, luidime iwona sia yanu; indi nyi wechisukio.

⁶ Ṟu lya kifahio liichio mṟinyi! Ṟu liwukie hekalunyi! Ṟu lya Mndumii ahoṟwo nalyo wakituwa wake!

⁷ Alamewona mawawio nalefee; Mawawio halawemfooye, Kafee mana o womi.

⁸ Nyiu alemeicho idedo cha ili? Nyiu alemewona mbonyi cha itsi? Ngesa oruka loidima ifeo mkonu fumu? Mkambo fo wandu wafeo limu? Kipfa Sioni kiheri alewona mawawio, Nalefee mana oke.

⁹ “Ngesa, inyi njiende wana kufui na ifeo, njide njilatarama?” Mndumii ahamba, “Inyi njechitarama njiime wusu wulafee?” Ruwa ahamba.

¹⁰ “Chihiyonyi hamu na Yerusalemu, kapenyi ngululu nyo mumkundi; chihiyonyi hamu nao ko sia, nyo mose muifihiṟa kipfa kyake.

¹¹ Kundu muonge, naihutso nyi maruwa ha msiha foke, muidime ing'ana na ichihiṟo nyi mfoeṟa fo wuitoṟi woke.”

¹² Kipfa Mndumii nahamba adi, “Ambuya njechimhaluya ofoṟo cha meda, na wuitoṟi wo wandu wa mkambo cha kimeda kiichuo, kundu nyo muidime ionga; na iiro; mulembolembo ndenyi.

¹³ Mfanano fo mndu aiwihiṟio moo nyi mae, nyi wudo nyo mochiwiṟio moo nyi inyi; nanyo nyi mochiwihiṟio moo ipfo Yerusalemu.

¹⁴ Nanyo nyi mochiwona, na mrima yanu nyi yechichihiyo, na mafuo hanu hechileheka cha maṟa mawishi; na owoko lo Mndumii lochimanyika luindukie waṟundi wake, nao nyechiwonyia wakituwa wake nyashi.

¹⁵ Kipfa Mndumii naicha cha modo na magari hake ha shida cha otanu lo kiwiriwiri; kundu natae kiṟache kya nyashi yake ko modo fuaka na mapfundo hake kui olewo lo modo.

¹⁶ Kipfa Mndumii naanduyana na wose wawode mbihu, kui modo na oshu loke; iwo wechiwoho nyi Mndumii wechiwa wafoi.

¹⁷ Wandu walya wekuilisha, na isambia shahunyi, nduma ya ichu ai makidi hawi wechilya nguwe, na masuiṟo na makokoi; wechitsitsa kimu,” Mndumii ahamba.

¹⁸ “Inyi njiichi mawuto hawo, na makusaṟo hawo; kuwode kiheri kicha, njechisanyia wandu wa mkambo na shishomo; nawo wechicha, wechiwona wuitoṟi woko.

¹⁹ Na inyi njechiwika kichano kiidi kyawo, inyi njechiduma wakiṟe ko mkambo ya wandu, Tarshishi, na Puli, na Ludi, wekuruo uda, ko Tubali na Yowani, njoruka tsitengetie mṟinga tsi kuleshe; wandu walalemeicho mbonyi tsako, ma iwona wuitoṟi woko; nawo wechionguo wuitoṟi woko kiidi kya wandu wa mkambo.

²⁰ Nawo wechiende wana wa wama wanu wose wawukie kiidi kya mkambo yose, wawe mwano ko Mndumii, huye ya frasi, na kiidi kya magari, na kiidi kya kitaṟa na huya nzoi, na huye ya mando hai na moo mwangu, mṟasa fumvu lyako liele Yerusalemu, Mndumii ahamba; chando wana wa Israeli wekeende shiano shawo kanyi ko Mndumii kiidi kya shihia shicha.

²¹ Kiidi kyawo njechisambuṟa maata wawe Wakohanyi na maata wawe Walewi. Nyi inyi Mndumii-Ruwa ngahamba.

²² Chandu ruwehu njihya na oruka luhya, njechitsiwika, na chandu tsekaa oshangunyi loko, Mndumii ahamba, nyi wudo oshari lonu na rina lyanu lechiwa.

²³ Na kechiwa, meri mhya mṟasa meri mhya, na sabato mṟasa sabato, wandu wose wechicha injiwikia wuindi, Mndumii ahamba.

²⁴ Nawo wechihenda nja wahende iwona mnying'a ya wandu walya walenjipiṟa nyi kipfa wechiliso wukiwa, fusa tsiipfo tsechipfa-pfo na modo fochirumapfo. Oshangunyi lo wandu wengi nyi wechiwa wandu wesuiṟa.”