YESAYA 64 - Bibilia Kui Mdedie fo Kimochi

¹ Kima kiwechiwa kong'alawuo ruwehu kosoka kundu mafumvu hadedeme oshangunyi lopfo,

² chandu modo fokekoṟa ngeṟa, na modo fokekoṟa mṟinga; kundu nomanyishe wakituwa wapfo rina lyapfo, wandu wa mbaṟi tsose wadedeme oshangunyi lopfo.

³ Chando ulewuta shindo shiṟihishie lulawekusirie, nolesoka, mafumvu halededema oshangunyi lopfo.

⁴ Kipfa wokia kacha wandu walekunda iichopfo, ma imanya kui madu hawo, manya riso lilewona Ruwa-pfo, sile nyio mowuta shindo kya ulya mokuweda.

⁵ Iyo nokeambia ulya mowuta shilya shichihiṟie shi sha lohi, wandu walya wekekumbuo njia tsapfo; ambuya, nyi uwewode nyashi naso lulewuta wunyamaṟi; lomekaa kiidi kya mbonyi tsi kiheri kileshe, ngesa, so lochihiṟo?

⁶ Kipfa so lose lui cha mndu afanyi, na mawuto hadu hose hai cha nguo ifanyi ngafu; so lose luinaa cha maṟa na mawicho hadu hakaluwuta chandu otanu lokewiwita.

⁷ Kake kuwode molaha rina lyapfo, na itambahana nakuwadepfo; kipfa noluṟikie oshangu lopfo na iyo kolutoromesha kui mawicho hadu.

⁸ Kyaindi wulalu, hoi Mndumii, iyo nyi ndeadu; so nyi teri, iyo mowumba, so lose lui iṟunda lya owoko lopfo.

⁹ Hoi Mndumii ulawado nyi nyashi ing'anyi, ma kulawone kochikumbuo mawicho mkonu yose; haluka, keambuya lokuterewa, so lose lui wandu wapfo.

¹⁰ Mṟi yapfo njiele yawa cha nuka ya msanga; Sioni ya mrapu, na Yerusalemu yanyamaṟo.

¹¹ Mba yadu njiele, na njicha, kulya wandeadu walekuṟumisha, yasaramaya na modo; shindo shadu shiweipfo shicha shanyamaṟika.

¹² Ngesa, nochida kulaambuya mbonyitsi Mndumii? Nochitsia, na ilulisa mnu wukiwa mṟasa indi?