YESAYA 63 - Bibilia Kui Mdedie fo Kimochi

Mndumii ahoṟwo wakituwa wa wandu wake

¹ Nyiu ichu awuka Edomu, Awode nguwo tsifanyi samu awuka Bosra? Ichu awode nguwo tsa wuhuru, Akeri ihenda kiidi kya wusuṟi na pfinya tsake? Inyi njideda na wusumhanyi, ai mopfinya mokiṟa.

² Kitewe maṟao hapfo hawe kimande, Na nguwo tsapfo cha mochumachuma sabibu nki?

³ “Ndechuma onanda njimonyi; Ma kiidi kya wandu kuwewode mndu cha inyipfo, Njilewachuma na nyashi yako, ngawafunja njiichuo nyashi, Ambuya nguwo tsako tsifanyi samu yawo, na inyi ngafanyitsa nguwo tsako tsose.

⁴ Kipfa Mkonu fo kiṟache fuwei mrimenyi foko, na maka fowo njilewakiṟa fomeawukia.

⁵ Ngaambuya, ma kuwode motarama-pfo; Ngaṟihiyo kipfa kulawewode moringa na iiṟicha; Kyasia owoko loko njimonyi lulenjiendie okiṟo, Nyashi yako nyi ilenjitarama ngahoṟoka.

⁶ Ngachuma-chuma shishari sha wandu na nyashi yako, Ngawananza kui nyashi, Ngapusuo samu yawo ikatonyikia wanda.”

Wucha wo Ruwa ko Israeli

⁷ Ngahamba wucha wo Mndumii, kiṟumi kya Mndumii ko shose Mndumii aleluwutia; na mfoeṟa fo wucha woke ko mba ya Israeli chando alewawutia kui isaṟia na wuhoo woke, wucha woke wukaingiki.

⁸ Kipfa nalehamba, “Nyi kya lohi iwa nyiwo wandu wako, wana walawode mtambo; kawa mkiṟa owo.”

⁹ Kiidi kya mawukiwa hawo hose aleduma ma malaika mowakiṟapfo; Nyio amonyi alewakiṟa; kawakiṟa kawaira kawaduo tete mafiri hose wokia kacha.

¹⁰ Indi wo wakadeko itane wasuiṟa Mumuyo Mwele; kyasia kawahaluka, kawa mkituwa, kakapana nawo.

¹¹ Nlyo mandi alekumbuo mafiri halya ha kuwoka, kiheri kya Mose na wandu wake kehamba, “Oku ulya alemdosa wuka ipalyipalyinyi hamu na walisi wa ipo lyake? Oku ichu alewika Mumuyo Mwele kiidi kyawo?

¹² Alewasongoya ko owoko loke luele, ko owoko lo kulyo lo Mose? Nyi aleletsana mṟinga kawi wawonyi, kundu wawone weching'anyisha rina lyake mlungana?

¹³ Alewasongoya kulya kuṟungukie cha frasi kulya nuka ya msanga walakape tulia?”

¹⁴ Cha ili mbe tsisokia pichinyi, Mumuyo fo Mndumii fukawasiṟa moo; nyi wudo ulesongoya wandu wapfo, kundu ukuwikie wuitoṟi rina lyapfo.

¹⁵ Ambuya wokia ruwehu, uwone wuka handu ha wuitoṟi wopfo na wumangi wose; iṟisa-ṟisa na pfinya yapfo sheku? Msiha fo mrima fopfo,

¹⁶ na kipfa iyo nyi ndeadu, manya chando Abrahamu alaluichi, ma Israeli eidima ilusendapfo, Iyo Mndumii, nyi Iyo ndeadu, “Mkiṟa odu,” mlungana, na mlungana nlyo rina lyapfo

¹⁷ Alewo Mndumii nkili oludetsa njia tsapfo kolutewa lukaumiṟa mrima yadu lulakuowuo hoi, wuya kipfa kya waṟundi wapfo, oshari lo kyoṟa kyapfo.

¹⁸ Wandu wapfo waele waleitoṟia oruka ko kiheri sa kifui. Wakituwa wadu wakacha wakanyamaṟa handu hapfo haele.

¹⁹ Lukaawa cha wandu ulawachilie manya le, cha wandu walawalahe ko rina lyapfo.