YESAYA 62 - Bibilia Kui Mdedie fo Kimochi

Yerusalemu yechikiṟo

¹ Kipfa kya Sioni njechitsia saupfo, na kipfa kya Yerusalemu njechiidima isia moo pfo na mtano wusumhanyi woke wochiloṟa saa, na okiṟo loke cha taa iaka.

² Na mkambo fo wandu fochiwona wusumhanyi wopfo na wamangi wose wechiwona kiṟumi kyapfo; na iyo nochilaho rina lihya, lyechisendo nyi dumbu lya Mndumii.

³ Na iyo nochiwa oṟo njicha kuwokonyi ko Mndumii na kitambaa kipfunge mdohu kya wumangi kuwokonyi ko Ruwa opfo.

⁴ Ochikilahose, “Amdepfo,” ma oruka lopfo lochikilahose, “wukiwapfo;” indi nyochilaho “Hefsipa;” (cha ilyi ohamba njimchihie kyake) na oruka lopfo “Beula” (cha ili ohamba na mwaalike) kipfa Mndumii nachihiyo kyapfo na oruka lopfo lochialiko.

⁵ Kipfa chando manake o kisoṟo aalika mana o waka, nyi wudo icho alekuwumba echiwa mii opfo; na chando menyi walyi ekechihiyo kipfa kya mpora aalika; nyi wudo Ruwa opfo echichihiyo kyapfo.

⁶ Njiwikie waringi huya njomombo tsapfo iyo Yerusalemu; wechitsia mfiri ma kiopfo; nyo mui wetamṟa Mndumii mulatsie sau;

⁷ ma mulamleheṟe natsie sau, mṟasa nawanze Yerusalemu na ifuinenga kiṟumi wuyanenyi.

⁸ Mndumii nalya nyamu kui owoko loke lo kulyo, na owoko loke lo pfinya tsake, nyi lohi njechiinenga wakituwa wapfo mso fopfo fuwe kelya kyawopfo, na mhenu echinyo mvinyo yapfo-pfo iya uleiṟundia.

⁹ Kyaindi walya walesambuo nyiwo wechiilya na iichika Mndumii; na walya walehaa nyiwo wechiinyo, ipfo osehu lo haele hako.

¹⁰ Idenyi, Idenyi, mongonyi; Sungusienyi njia ya wandu; Sumenyi, sumenyi njia; kuṟuonyipfo maho; Hoṟotsenyi bendeṟa kipfa kya shishari sha wandu.

¹¹ Ambuya Mndumii ameonguo mbonyi mṟasa mtsitsioni fo oruka, Wienyi mana o Sioni, “Ambuya, okiṟo lopfo luicha; Ambuya, wueri woke wui kimu nao, Na kilya ketaa kii kyake kii nao.”

¹² Nawo wechimulaha, wandu waele, Walekiṟo nyi Mndumii, Na iyo nochilaho, “Aleshiho, Mṟi fulaledeo.”