YESAYA 61 - Bibilia Kui Mdedie fo Kimochi

Mbonyi njicha tsa okiṟo

¹ Mumuyo fo Mndumii-Ruwa fui huye yako; kipfa Mndumii amenjishimbuo, njiongoye wakunyiiṟie mbonyi njicha; nanjidumie kundu njichiṟe walya waluo wose na walya wahutsie macha ha ikiṟo, iongoya wapfunge kya ilekio na walya walewado shidenyi kya iwihiṟo kowo.

² Ihamba kya maka fo Mndumii fuwaṟi, na mkonu fo kiṟache kya Ruwa odu; iwihiṟia moo wose waifuha;

³ iwia iwo waifuha kiidi kya Sioni, wainengo oṟo ya shiwaṟo walekane na ifu, wakushie mafuda handu ha ikapa kilio, maṟao ha wuitoṟi handu ha mrima fukuinadie; kundu walaho nyi mashidi ha wusumhanyi, hai madonge nyi Mndumii kundu nang'anyisho.

⁴ Nawo wechiwika mba handu ha kuwoka handu hanyamaṟe, wechiira handu haweolokie na ihadimo ili mboko, wechisungusia mṟi iya iwewundukie, handu kuwei kude kishari numa ya kishari.

⁵ Wahenu wechihoṟoka na ilisa mapo hanu, wandu wa mkambo fungi wechidema konu na iambuya msabibu yanu.

⁶ Kyaindi nyo nyi mochilaho nyi, “Wakohanyi wa Mndumii;” wandu wechimlaha nyi wahidi wa Ruwa odu; mochilya wusuṟi wo wandu wa mkambo, na ikuṟumisha kya wuitoṟi wowo.

⁷ Mbonyi tsechiilachika, handu ha sonu tsanu mochiwona sia kaṟaṟu, handu ha isuka wechichihiṟo nyi kenga kyawo; kyasia, wechiikolonyia oruka lowo na sia yawo yechiwa ya mlungana.

⁸ Kipfa, “Inyi Mndumii njikundi mwanduye fo wusumhanyi, njisuo wunyenyi na wuwicho;

⁹ Kishari kyawo kechimanyika kiidi kya mkambo fo wandu, oshari lowo kiidi kya mbaṟi tsa wandu; wandu wechiwawona wo wechiidikia ke nyi wandu waiwawikie ona nyi Mndumii.”

¹⁰ Njechichihiyo mnu kiidi kya Mndumii, mrima foko fochikesa kiidi kya Ruwa oko; kipfa nanjiṟikie maṟao ha okiṟo, kanjishikia na nguwo ya wusumhanyi, chandu menyi walyi ekekusungusia kui kofia ya shiwaṟo, na mpora chando ekekusungusia na shindo sha sahabu.

¹¹ Kipfa chando oruka lokedosa njana tsalo; na chando shahu shekekumbia necha shilya shiwaye-pfo; nyi wudo Mndumii-Ruwa echiwaya lohi na kiṟumi oshangunyi lo wandu wa mkambo wose.