YESAYA 60 - Bibilia Kui Mdedie fo Kimochi

Yerusalemu njihya

¹ Kure nolimike, kipfa sa yapfo yamecha, Na kiṟumi kya Mndumii kyamekuwaṟia.

² Kipfa ambuya, mema fochishikia wuyana, Na mema rambatanyi fochishikia njoshari tsa wandu; Indi Mndumii nechikuwaṟia iyo, Na kiṟumi kyake kechiwoneka huyapfo.

³ Na wandu wa masanga wechichea sa yapfo, na wamangi wechichea ngela yapfo.

⁴ Iria meso hapfo noambuye njora tsose; Wose wakuwumbia, wakuchea iyo; Wana wapfo waicha wawuka kuleshe. Na wana wapfo wa kika wario kihodonyi.

⁵ Na lyondi ochiwona na iwikio saa, Na mrima fopfo fochidedema na iharama; mamiingi ya ipalyipalyi yechihalutsio kopfo, Na wusuṟi wo mkambo ya wandu wochikuchea.

⁶ Mfoeṟa fo ngamia fochikushikia, Ngamia njikoho tsa Midiani na Efa; Wose wechicha wawuka Sheba; Wechiende sahabu na uvumba, Na ionguo wucha wo Mndumii.

⁷ Mapo hose ha Kedari hechikuwumbia kopfo, masuwa ha Nebayothi hechikuṟundia; Hechidoya kitaṟenyi kyako kedasia kui momu, Na inyi njeching'anyisha mba ya wuitoṟi woko.

⁸ Nyi waki iwa wairunduka cha ipuchi, cha mbeta tsihenda sungunyi tsawo?

⁹ Na kya lohi njoruka tsiṟingichie mṟinga tsenjiweda, Na merikebu tsa Tarshishi kuwoka, Tsihenda iende wana wapfo wuka kuleshe, Fesa na sahabu tsawo kimu nawo, kipfa kya rina lya Mndumii-Ruwa opfo, Kipfa kya Mwele o Israeli, Kipfa nyi akuichika iyo.

¹⁰ Wahenu wechiwika ko uhya mawanda ha mba tsapfo, wamangi wechikuhidia; Kipfa kya nyashi yako njilekukapa, Indi kipfa kya ikunda njilekusaṟia.

¹¹ Mongo yapfo yechishingopfo; Yekaa injiṟuhuo mfiri na kio; Kundu wandu waidime ikuendie wusuṟi wo mkambo, Na wamangi wechisongoyo kimu nawo.

¹² Kipfa orio oshari na wumangi wo wandu, Walya walakunda ikuṟundia wechiarisika; Ee, wandu wa mkambo-yo wechinyamaṟo kichikichi.

¹³ Wuitoṟi wo Lebanoni wochikuchea iyo, Mashidi mecha hasanyio handu hamu; kundu hasungusie handu hako haele, Ambuya njeching'anyisha handu hako ha madende.

¹⁴ Wana wa wandu walya walekulisa wukiwa, Wechicha na kopfo wakuolokie; Walya wose walekupiṟa Wechioloka washike madendenyi hapfo; nawo wechikulaha, “Mṟi fo Mndumii,” Sioni o Mwele o Israeli.

¹⁵ Kipfa noledeo na isuika, kulakae ma mndu aleida kopfo, njechikuhaluo kiṟumi kya mlungana, Sia ya shishari shifoi.

¹⁶ Nochionga maruwa ha mkambo, nochionga mawee ha wamangi; Na iyo nochimanya ke Inyi nyi Mndumii Mkiṟa opfo, Na Mkiṟa opfo, menyi Matorito o Yakobo.

¹⁷ Handu ha aṟeṟa njeende sahabu, Handu ha menya njeende fesa, Handu ha ikidi njeende aṟeṟa, Handu ha maho, menya; Njechihaluo walya wekuhoṟokia wakuhoṟokie kui wukiilohi na ofoṟo na wusumuhanyi.

¹⁸ Wulang'a na mtambo shechiwonose orukeni lopfo-pfo, Inyamaṟika na fowa shechisia kopfo. Indi nochilaha mawanda hapfo, “Okiṟo,” Na mongo yapfo, “Kiṟumi.”

¹⁹ Mnengeṟi fochiwa saa yapfo ya mfiri-pfo, Ma meri fochikulimikia-se kio pfo; Mndumii nyio echiwa saa yapfo ya mlungana, Na Ruwa opfo nechiwa kiṟumi kyapfo.

²⁰ Mnengeṟi fopfo fochiolokia sepfo, Ma meri fochikuletsana pfo; Kipfa Mndumii amonyi nyi echiwa saa yapfo mlungana. Na mfiri ya kilio kyapfo yechitsitsa.

²¹ Wandu wapfo wechiwa wenyi wusumhanyi wose, Nawo wechioṟa oruka mlungana; Njana njileiwaya inyi njimonyi, Nyi iṟunda lyako inyi njimonyi, Kundu njiṟumisho.

²² Mtutu nechiwa kiku, Na ulya mfafa nechiwa oshari luwode pfinya; “Inyi Mndumii, njechiinutsia isho kiheri kyake.”